بەریتانیا قاچاغچییەكی كورد بەتۆمەتی خنكانی چەندین كۆچبەر دەستگیردەكا
  2022-11-30       519       

کاوە رەش، بەریتانیا
 

ئاژانسی تاوانی نیشتیمانی بەریتانیا ڕایگەیاندوە كەبەرەبەیانی ڕۆژی سێ شەممەی كاتژمێر ٦.٤٥ خولەكی بەرەبەیان لێكۆڵەرەوەكانیان شانبەشانی ئەفسەرانی یەكەی نیشتیمانی لە شاری گلۆستێرشایر، كوردێكی قاچاغچیان دەستگیرکردوە كەپەیوەندی ڕاستەوخۆی بەگیان لەدەستدانی لانیکەم ٢٧ کۆچبەرەوە هەیە، کەلەمانگی نۆڤەمبەری ساڵی ڕابردوودا لە هەوڵی پەڕینەوە بەدەربەندی ئینگلیزیدا خنکاون.

 

بەپێی ئاماژە پێدانی ئاژانسی تاوانی نیشتیمانی بەریتانیا، بەناسنامەی قاچاغچیەكە،  ناوی تەواوی (هەرێم ئەحمەد ئەبوبەکەر)ە،و تەمەنی ٣٢ ساڵە،لەناونیشانێک لەناوچەی چێڵتنهام دەستگیرکراوە.

 شوێن پێ هەڵگرتن و دەستگیركردنی ئەو قاچاغچییە بەهاوكاری لەگەڵ دەسەڵاتدارانی فەرەنسا  ئەنجامدراوە كەكاریان كردوە بۆ لێکۆڵینەوە لەو كارەساتەی نۆڤەمبەری ساڵی ڕابردوو کەبووەتە هۆی مردنی خنكانی دەیان كۆچبەر.

 ناوبراو یەكێكە لەئەندامی گروپی تاوانە ڕێکخراوەکان، کەدەستی هەبووە لەگواستنەوەو پەڕاندنەوەی چەندین کۆچبەری نایاسایی بۆ بەریتانیا بەبەلەمێکی بچووک.

لەنێویاندا یەكێك لەو بەلەمانەی هەوڵی پەڕاندنەوەی داوە بۆ بەریتانیا دوای جێهێشتنی کەناراوەکانی فەرەنسا، ژێر ئاو كەوتووە، بەهۆیەوە جگە لەدوو کەسی ناو بەلەمەكە، هەموویان گیانیان لەدەستداو تائێستاش چوار کۆچبەر بێسەروشوێنن.

 دوای دەستگیرکردنی هەرێم ئەحمەد ئەبوبەكر، بڕیارە ناوبراو سبەی لەبەردەم دادگای وێستمینستەردا ئامادەبێت، تا ڕێكارو ڕێوشوێنی ڕادەستکردنەوە دەستپێبكات لەگەڵ دەسەڵتدارانی فەرەنسا، چونكە كارەساتەكە لەژێر كۆنتڕۆڵی ئاوی فەرەنسادا ڕوویداوە.

 كرایك تۆرنەر، جێگری بەڕێوەبەری ئاژانسی تاوانی نیشتیمانی بەریتانیا دەڵێ; ئەم ئۆپراسیۆنە گرینگ و بەرچاوە، لەچوارچێوەی لێکۆڵینەوەیەکی بەرفراواندا بووە، سەبارەت بەو ڕووداوانەی کەبوونەتە هۆی خنكانی ئەو كۆچبەرانەی لەو كارەساتە دڵتەزێنەدا بوون لەبەندەرەكەدا.

هەروەها ناوبراو  ئاماژەی بەوەشکردووە، ئەو قاچاغچییەی ئەمڕۆ دەستگیرکراوە گومان دەکرێت ڕۆڵێکی سەرەکی هەبووبێت، لەگیان لەدەستدانی بەئەنقەستی ناو بەلەمەكە.

 ئەو بەرپرسەی ئاژانسەكە دەڵێ، ئەوان لەنزیکەوە لەگەڵ هاوبەشە فەرەنسییەكانیان بڕیاریانداوە هەموو هەوڵێک بدەن بۆ بەدەستهێنانی مافی دادپەروەری بۆ کەسوکاری ئەو کەسانەی کە ژیانیان لەدەست داوە لەو كارەساتەدا، وەهەوڵی بێ ماندوبونیش دەدەن بۆ پەکخستن و هەڵوەشاندنەوەی تۆڕی چەپەڵی تاوانکاریی و ڕێکخراوەیی قاچاغچییەكان، ئەوانەی تێوەگلاون لەبازرگانی كردن بەمرۆڤەوە. 

 وەزیری ناوخۆی بریتانیا، سوێلا براڤەرمان، لەبارەی دەستگیرکردنی ئەو قاچاغچییەوە دەڵێ: سەرباری هاوخەمیی و هاوسۆزی بەردەوامی من، لەگەڵ خێزانی هەموو ئەو کەسانەی کە بەو شێوەیە کارەساتبارو خەمبارە گیانیان لەدەستدا لەم ڕووداوەدا،

سوپاسی هەموو دەزگاکانی دیکە لەسەرانسەری بریتانیاو فەرەنسا دەکەم، بۆ کارە گرینگ و ماندونەناسانەیان بۆ چەسپاندنی دادپەروەری بۆ قوربانییەکان و خێزانەکانیان لەڕێگەی دەستگیرکردنی ئەو تۆمەتبارانەی کەپێمان وایە، بەرپرسیارن لە ڕووداوانە. وە دەبێ ئێمە دڵنیابین لەوەی، هێزی یاسا بەتەواوی  بەسەر تۆمەتباراندا جێ بەجێ دەكرێت.

جێی وەبیر هێنانەوەیە، لە٢٤نۆڤەمبەری ساڵی ڕابردوو، بەلەمێكی پەناخوازان كەهەوڵی پەڕینەوەی دەدا لەفەڕەنساوە بۆ بەریتانیا بەنایاسایی، لەكەناڵەكەدا تێكشكاو ژێر ئاو كەوت.

لەو ژمارەیە لانی كەم ٢٧پەناخواز خنكان و چوار كەسی دیكەش تائێستاش بێ سەروشێنن و تەنها دووكەس بەزیندووی ڕزگاریان بوو.

پەناخوازەكان زۆربەیان خەڵكی هەرێمی كوردستانی عێڕاق بوون و لەنێویاندا ٢٠ لەوان خەڵكی شارۆچكەی ڕانیەیی سەر بەپارێزگای سلێمانی بوون.

لەساڵیادی ئەو كارەساتە تراجیدییەدا، كەناڵی (ئای تیڤی) بەریتانی،دۆكۆمێنتەریەكی ٦٠ خولەكی دەربارەی ئەو ڕووداوە بڵاوكردوە، كەنزیكەی یەك ساڵی خایاندوە لەبەرهەمهێنانی و تێدا بەشێك لەخێزانی قوربانییەكان و یەكێك لەڕزگاربوەكان، چیرۆكی كارەساتەكە دەگێڕنەوە.

هەروەها كەناڵی ئای تیڤی لەڕێگای ڕۆژنامەوانێكی كوردەوە بەنهێنی شوێن پێی قاچاغچییەكانی، دەنكیغ و كاڵاسی سەرسنوری فەڕەنسا هەڵدەگرێی و، لەوێ ڕەوشی بازرگانیكردن و پەڕاندنەوەی كۆچبەران تۆمار دەكات.

زۆرترین بینراو
© 2023 Awene Online, Inc. All Rights Reserved.
×