ئا: ئاوێنە
بەقسەی پەرلەمانتارێكی یەكگرتوی ئیسلامی لە پەرلەمانی عێراق، لایەنە بەرپرسەكانی هەرێمی كوردستان داوایان لە وتاربێژانی مزگەوتەكان كردوە لە وتاری هەینیدا باسی شەڕی فەلەستین نەكەن. پێشی وایە "ئەمە پێمان دەڵێت کە بەرپرسانی ئەم وڵاتە لە ڕاستیدا دژی دین و پیرۆزییەکانی دینی خەڵکی کوردستانن."
دارا سێكانیانی، پەرلەمانتاری یەكگرتوی ئیسلامی لە پەرلەمانی عێراق لە راگەیەندراوێكدا وتی "لایەنە پەیوەندیدارەکان لە حکومەتی عێراقی فیدراڵ داوایان لە زانایانی ئایینی کردوە کە لە وتاری ڕۆژی هەینیدا باسی هێرشەکانی دەوڵەتی زایۆنی بکەن بۆ سەر هاوڵاتیانی بێتاوانی فەلەستینی لە کەرتی غەزە."
ئەو پەرلەمانتارە وتوشیەتی"بەڵام لە حکومەتە کاربەڕێکەرەکەی لای خۆمان لایەنە بەرپرسەکان داوایان لە وتاربێژانی مزگەوتەکانی کوردستان کردوە کە لە میانەی وتاری هەینیدا نابێت باسی شەڕی نێوان قەوارەی زایۆنی و موسوڵمانەکانی فەلەستین بکەن."
دارا سێكانیانی پێی وایە "ئەمە پێمان دەڵێت کە بەرپرسانی ئەم وڵاتە لە ڕاستیدا دژی دین و پیرۆزییەکانی دینی خەڵکی کوردستانن."
ئەو پەرلەمانتارە وتوشیەتی"لە کاتێکدا مزگەوتی ئەقسا یەکەم ڕوگەی (قبله)ی موسوڵمانان بوە، ئەبێت حکومەتی هەرێمی کوردستان بەزورترین کات بێتە سەرهێڵ كە ئایا ئەوە هەڵوێستی فەرمی حکومەتی هەرێمە بەرانبەر بەم ڕوداوە یان هەڵوێستی چەند کەسێکی نابەرپرسە."
پەرلەمانتارەكەی یەكگرتوی ئیسلامی لەو بڕوایەدایە ئەو هەڵوێستە "زیانی زۆر گەورە" بە ناو و ناوبانگی کورد دەگەیەنێت.