سەرلەبەیانی ئەمڕۆ هەینی نرخی نەوت لە بازاڕەكانی جیهان دابەزینی بەخۆیەوە بینی ئەوەش لەدوای لێدوانی بەرپرسێكی بانكی ناوەندیی ئەمریكا لەبارەی نرخی سودی بانكییەوە.
ئاوێنە: سەرلەبەیانی ئەمڕۆ هەینی نرخی نەوت دابەزینی بەخۆیەوە بینی و لە ئێستادا یەك بەرمیل نەوتی خاوی برێنت بە 83 دۆلار و 17 سەنت و هەروەها یەك بەرمیل نەوتی تەكساس بە 78 دۆلار مامەڵەی پێوە دەكرێت.
دابەزینی نرخی نەوت دوای ئەوە هات كە كریستۆفەر واڵەر، ئەندامی ئەنجومەنی بانكی ناوەندیی ئەمریكا رایگەیاند، پێویستە دابەزاندنی بەهای سودی بانكی بۆ دو مانگی دیكە دوابخرێت.
ئەوەش لەكاتێكدایە كە خواست لەسەر نەوت لە بازاڕەكانی جیهان بەرزبۆتەوەو شرۆڤەكارانی بوارەكە پێشبینی دەكەن لە چەند رۆژی داهاتودا نرخی نەوت رو لە بەرزبونەوە بكاتەوە.