دابەزینی بەهای لیرەی تورکیا دیسان ژمارەی پێوانەیی شکاند و نرخی هەر 100 دۆلاری ئەمەریکا گەیشتە نزیکەی سێ هەزار و 200 لیرە.

به‌گوێره‌ی xe نرخی هه‌ر 100 دۆلاری ئه‌مه‌ریكی  لە دابەزیندایە و لە ماوەی یەک مانگی رابردوودا لیرە بە رێژەی 4.25% بەهای خۆی بەرانبەر دۆلار لەدەست داوە. لەدەستدانی بەهای ئەو جۆرە دراوە لە یەک ساڵی رابردوودا بە رێژەی 40.79%، لە دوو ساڵی رابردوودا بە رێژەی 54.10%، لە پێنج ساڵی رابردوودا بە رێژەی  نزیکەی 83% و لە 10 ساڵی رابردوودا بە رێژەی  نزیکەی 93% بووە.

بە واتایەکی تر لە ماوەی یەک مانگی رابردوودا بەهای دۆلار بەرانبەر لیرەی تورکیا بە رێژەی 4.43%، لە ماوەی یەک ساڵدا بە رێژەی 69%، لە ماوەی دوو ساڵدا بە رێژەی 118%، لە ماوەی پێنج ساڵدا بە رێژەی 488% و لە ماوەی 10 ساڵدا بە رێژەی 1323% زیادی کردووە.

له‌ چه‌ند ساڵی رابردوودا ره‌جه‌ب ته‌یب ئه‌ردۆغان سه‌رۆك كۆماری توركیا، سیاسه‌تی تاكڕه‌وانه‌ی پێڕه‌و كردووه‌ و له‌ بنه‌ماكانی دیموكراسی و دادپه‌روه‌ری دوور كه‌وتووه‌ته‌وه‌. ئه‌م كارانه‌ی ئه‌ردۆغان بووه‌ته‌ هۆی لاوازكردنی پێوه‌ندییه‌كانی ئه‌و وڵاته‌ له‌گه‌ڵ رۆژئاوا و پاشه‌كشه‌ی ئابووری وڵاته‌كه‌.  

ئەردۆغان مانگی رابردوو بە بڕیارێک سەرۆکی بانکی ناوەندیی تورکیای گۆڕی  و ئەو بڕیارەش نەیتوانیوە بەهای لیرە بەرز بکاتەوە و تەنانەت بێبەهاتری کردووە.

نرخی 100 دۆلار له‌ سه‌ره‌تای ساڵی 2022ی زاینی هه‌زار و 350 لیره‌ بوو بەو پێیە لە ماوەی نزیکەی دووساڵدا هەزار و 850 لیرەی تر هاتووەتە سەر هەر 100 دۆلاری ئەمەریکی . بەهای  100  دۆلار  له‌ سه‌ره‌تای ساڵی 2021 سه‌رووی 700  لیره‌ و له‌ سه‌ره‌تای ساڵی 2020 خوارووی 600 لیره‌ بوو. له‌ ساڵی 2011دا نرخی 100 دۆلار به‌ 150 لیره‌ بوو، ئه‌مه‌ش ده‌ریده‌خات له‌ ماوه‌ی 12 ساڵی رابردوودا لیره‌ پاشه‌كشه‌یه‌كی زۆری كردووه‌ و بەهای دۆلار بەرانبەر لیرە سه‌رووی 21 هێنده‌ زیادی کردووە.

ئەردۆغان  ساڵی رابردوو لە هەڵبژارد سەرکەوت و  چوار ساڵی تر لە دەسەڵاتدایە و پێشبینی دەکرێ ئابووری تورکیا زۆر خراپتر بێ چونکە پێوەندییەکانی لەگەڵ رۆژئاوادا باش نین و ئەگەر بخوازێ پەرە بە ئابوورییەکەی بدا دەبێ بگەڕێتەوە هەمان پێوەندی کە ئەردۆغان لە سەرەتای سەدەدا هەیبوو.