پسپۆڕێکی ئابووری بڵاوی کردەوە، عێراق و ئێران لە بارەی قەرزی غازەوە گەیشتنە ڕێککەوتن، دەشڵێت، قەرزەکان مەزەندە دەکرێت بە ١١ ملیار دۆلار، کە عێراق دەبێت بیداتەوە بە ئێران.

نەبیل مەرسومی پسپۆڕی ئابووری لە تۆڕی کۆمەڵایەتی فەیسبوک لەبارەی ڕێککەوتنی عێراق و ئێران سەبارەت بە دۆسێیەی قەرزی غاز بەم شێوەیە زانیاری خستووەتەڕوو:

لە سەرەتاى نووسینەکەیدا ئەو پسپۆڕى ئابورییە باسى لەوەکردووە، عێراق و ئێران لە بارەی قەرزی غازەوە گەیشتنە ڕێککەوتن.

ئەوەشى خستووەتەڕوو، قەرزەکانى سەر عێراق مەزەندە دەکرێت بە ١١ ملیار دۆلار، کە دەبێت بەغدا بیداتەوە بە ئێران.

پسپۆڕەکە ئەوەشی ئاشکرا کرد، عێراق ناتوانێت ڕاستەوخۆ قەرزەکانی ئێران بداتەوە بەهۆی سزاکانی ئەمریکا لەسەر ئێران، هەربۆیە هەردوو وڵات ڕێککەوتوون عێراق بەرهەمەکانی بفرۆشێت بەو کۆمپانیایانەی، کە ئێران دیاریدەکات و دواتر لە قازانجی بەرهەمی ئەو کۆمپانیایانە قەزرەکەی عێراق دەبڕدرێت.

جێگای ئاماژەیە، پێشتر لە چەند لێدوانێکیدا محەمەد شیاع سوودانی سەرۆک وەزیرانی عێراق ڕایگەیاندبوو، کە عێراق پاڵاوگەی بێجی خستووەتەوە کار و دەبێت چیتر پێویستی بە غازی ئێران نەمێنێت و ئەو قەرزانەی لەسەر عێراقن دەبێت بیانداتەوە بە ئێران.