یاریدەدەری وەزیری نەوتی عێراق بۆ كاروباری غاز ڕایگەیاند، تا كۆتایی ئەمساڵ ڕێژەی وەبەرهێنانی غاز بۆ ٪٧٠ بەرزدەبێتەوە، دەشڵێت، وەزارەتەكەمان كۆمەڵێك پڕۆژەی ستراتیژی جێبەجێ دەكات، بۆ وەبەرهێنانی غاز لە ژمارەیەك كێڵگەی نەوتدا.

 عیزەت سابر ئیسماعیل، یاریدەدەری وەزیری نەوتی عێراق بۆ كاروباری غاز سەبارەت بە زیادكردنی بەرهەمهێنانی غازی شل بۆ میدیا عێراقییەكان دەدوێت.

عیزەت سابر ڕایگەیاند، كردنەوەی ڕێڕەوى نوێ بۆ هەناردەكردنی غاز گرنگە، دەبێتە هۆی زیاد بوونی بەرهەمهێنانی غاز، لە ئێستادا بڕی ٥٠ تۆن لە مانگێكدا بەرهەم دەهێنین و تا سەرەتای ساڵی ٢٠٢٥ دەگاتە ٨٠ تۆن لە مانگێكدا، هەروەها لە ئایندەدا بەرهەمهێنان دەگاتە ١٢٥ تۆن لە مانگێكدا.

ئاماژەی بەوەشكرد، وەزارەتەكەمان كۆمەڵێك پڕۆژەی ستراتیژی جێبەجێ دەكات بۆ وەبەرهێنانی غازی شل لە ژمارەیەك كێڵگەی نەوتدا، ڕێژەی وەبەرهێنانی غاز تا كۆتایی ئەمساڵ بۆ %٧٠بەرز دەبێتەوە.

جێگای ئاماژەیە، حكومەتی عێراق گرێبەستی لەگەڵ چەند كۆمپانیایەكی بیانی كردووە، بۆ ئەوەی ڕێگرى لە بەفیڕۆچوونی ئەو غازە بگرن، كە لە كێڵگە نەوتییەكانەوە بەفیڕۆ دەچێت، ئێستا چەند كۆمپانیایەك سەرقاڵى  ئەو كارەن.