وەزارەتی نەوتی عێراق بڵاوی كردەوە، لە مانگی ئابی ئەمساڵدا بڕی ١٠٥ ملیۆن و ٨٤٥ هەزار و ٥٩٩ بەرمیل هەناردەی دەرەوە كراوە، هەروەها نزیكەی ٣٠٠ هەزار بەرمیلیش هەناردەی ئوردن كراوە.
وەزارەتی نەوتی عێراق سەبارەت بە كۆی گشتی هەناردەكردنی نەوت لە مانگی ڕابردوودا ڕاگەیاندراوێكی بڵاوكردەوە.
لە ڕاگەیاندراوەكەدا هاتووە، بەپێی ئامارە سەرەتاییەكان كە لە لایەن كۆمپانیای بە بازاڕكردنی نەوتی عێراقی (سۆمۆ) دەرچووە، كۆی گشتی بڕی هەناردەكردنی نەوتی خاو بۆ مانگی ڕابردوو (ئاب) گەیشتە ١٠٥ ملیۆن و ٨٤٥ هەزار و ٥٩٩ بەرمیل.
ئاماژە بەوەشكراوە، كۆی بڕی هەناردەكراوی نەوتی خاو بۆ مانگی ئاب لە كێڵگە نەوتییەكانی ناوەڕاست و باشووری عێراق ١٠٥ ملیۆن و ٥٥٩ هەزار و ٥٢٥ بەرمیل بووە.
ئەوەش خراوەتەڕوو، بڕی هەناردەكراو بۆ ئوردن ٢٩٨ هەزار و ٧٤ بەرمیل بووە، هەروەها هەناردەی نەوتی گەیارە یەك ملیۆن ٩٢٨ هەزار و ١٥٦ بەرمیل بووە.