شارەزایەکی ئابوریی عێراقی پێشبینیدەکات جەنگی ئێران‌و ئیسرائیل نرخی بەرمیلێک نەوت بگەیەنێتە 200 دۆلار.

ئاوێنه‌: نەبیل مەرسومی شارەزای ئابوریی عێراقیی پێشبینیکردوە، لەگەڵ فراوانبونی جەنگی نێوان ئێران‌و ئیسرائیل نرخی نەوت بەرزبونەوەی بەرچاو بەخۆوە بببینێت، بەشێوەیەک ئەگەر شەڕەکە دەوڵەتانی کەنداو بگرێتەوەو ئێران پەنا بباتەبەر داخستنی گەروی هورمز، ئەوە نرخی هەر بەرمیلێک نەوت بگاتە 200دۆلار، بەوپێیەی ڕێگریی لەڕۆیشتنی نزیکەی 20 ملیۆن بەرمیل نەوت بەرەو بازاڕەکانی جیهان دەکرێت.

مەرسومی ئاماژەی بەسێ سیناریۆی گریمانکراو بۆ شەڕی نەوتیی داهاتوو کردوە:

سیناریۆی یەکەم: ئەگەر ئیسرائیل بەندەرەکانی هەناردەکردنی نەوتی ئێران بکاتە ئامانج، بەتایبەتی دورگەی خەرج، کە 90%ی هەناردەی نەوتی ئێران تێیدا تێدەپەڕێت، ئەوە ڕەنگە ببێتە هۆی کەمبونەوەی خستنەڕوی نەوتی ئێران بەڕێژەی نزیکەی ملیۆنێک‌و 500 هەزار بەرمیل لەڕۆژێکدا.

ئەم کەمییە دەبێتە هۆی بەرزبونەوەی نرخەکان بەبڕی پێنج دۆلار، بەوەش نرخی بەرمیلێک نەوت دەگاتە 82 دۆلار، لەم حاڵەتەدا ئۆپێک پڵەس ڕەنگە دەستوەردان بکات بەهەڵوەشاندنەوەی سنوردارکردنی بەرهەمهێنان بۆ قەرەبوکردنەوەی زیانەکانی نەوتی ئێران، کە ڕەنگە نرخەکان بگەڕێنێتەوە بۆ ئاستی 70 دۆلار بۆ هەر بەرمیلێک.

سیناریۆی دوەم: ئەگەر شەڕەکە درێژببێتەوە بۆ ئەوەی تێرمیناڵەکانی هەناردەکردنی نەوت لەکەنداو بەتایبەتیی لەسعودیە بگرێتەوە، ئەوا ڕەنگە نرخی بەرمیلێک بۆ زیاتر لە 100 دۆلار بەرزبێتەوە.

سیناریۆی سێیەم: ئەگەر ئێران گەروی هورمز دابخات، ئەوا دابینکردنی بڕێکی گەورەی نەوت لەجیهاندا دەبڕێت، بەمەش نرخی بەرمیلێک بۆ نزیکەی 200 دۆلار بەرزدەکاتەوە، جگەلەوەش داخستنەکە کاریگەریی نەرێنی لەسەر بارکردنی غازی کەنداو دەبێت کە بەو گەروەدا تێدەپەڕن.

مەرسومی پێیوایە، هەر بەئامانجگرتنێکی ئیسرائیل بۆ پاڵاوگەکانی نەوتی ئێران ڕەنگە ببێتە هۆی کەمبونەوەی هەناردەی نەوتی ئێران بەڕێژەی نزیکەی 300 بۆ 400 هەزار بەرمیل لەڕۆژێکدا، بەڵام کاریگەریی ئەمە لەسەر نرخی نەوتی جیهانیی سنوردار دەبێت، بەتایبەتیی لەگەڵ گەڕانەوەی لیبیا بەرهەمهێنان بۆ ئاستی ئاسایی خۆی.