ئەندامانی لیژنەی دەستپاكی پەرلەمانی عێراق دەڵێن: لە چەند ڕۆژی داهاتوودا میوانداریی عەلی عەلاق پارێزگاری بانكی ناوەندی دەكرێت بۆ پەرلەمان، بۆ زانینی هۆكارەكانی بەرزبوونەوەی نرخی دۆلار.
ئاوێنە: عالیە نوسیف ئەندامێکی لیژنەی دەستپاکی لە پەرلەمانی عێراق ڕایگەیاند، لە چەند ڕۆژی داهاتوودا میوانداریی عەلی عەلاق پارێزگاری بانكی ناوەندی دەكرێت بۆ پەرلەمان، چەند تێبینییەكمان لەسەر سیاسەتی بانكی ناوەندی تۆماركردووە، لە كاتی میوانداریكردنی پارێزگاردا گفتوگۆیان لەسەر دەكرێت.
یوسف كلابی، ئەندامێکی دیکەی لیژنەکە ڕایگەیاند، لیژنەی دارایی پەرلەمان و ئەنجوومەنی نوێنەران شكستیان هێنا لە لێپرسینەوە لە پارێزگاری بانكی ناوەندی و نەیانتوانی كۆنترۆڵی نرخی دۆلار بكەن.
دەشڵێت: هەندێك كەسایەتی كە گومانی گەندەڵی و خراپ بەڕێوەبردن و كەمتەرخەمییان لێدەكرێت لەلایەن لیژنەی داراییەوە لێپرسینەوەیان لەگەڵدا نەكراوە.
ئەمە لەكاتێكدایە، ماوەی چەند ساڵێكە نرخی دۆلار بەرامبەر بە دیناری عێراق بەشێوەیەكی بەرچاو بەرزبووەتەوە، بەهای ١٠٠ دۆلار لە بودجەدا بە ١٣٢ هەزار دینار جێگیركراوە، بەڵام بازاڕەكاندا ١٠٠ دۆلار بە زیاتر لە ١٥٠ هەزار دینار مامەڵەی پێوە دەكرێت.