هەرچەندە گروپە چەکدارەکانی عێراق جەخت لە بەردەوامیی هێرشەکانیان بۆسەر ئیسرائیل دەکەنەوە، بەڵام بەرپرسانی ئەمریکا هۆشداری دەدەن لەوەی کە بەهۆی بەردەوامی هێرشەکانی ئەو گروپانەوە ئیسرائیل ئەگەرى وەڵامدانەوەى بەشێوەیەکى راستەوخۆ زیاد دەکات.
ئاوێنە؛ ئاژانسى هەواڵى ئەسۆشیەیتد پرێس لە زارى چەند بەرپرسێکى ئەمەریکییەوە کە ناویان ئاشکرا نەکراوە رایگەیاندووە، بەردەوامیی هێرشەکان لەخاکى عێراقەوە بە فڕۆکەى بێ فڕۆکەوان بە ئاڕاستەى ئیسرائیل ئەگەرەکانى وەڵامدانەوەى راستەوخۆى ئیسرائیلى زیادکردووە.
ئاژانسەکە ئەوەشی خستووەتە روو، رۆژانە پێنج هێرش لەناو خاکى عێراقەوە دژى ئیسرائیل ئەنجام دراون، بەتەنیا لەهەفتەى رابردووش هەشت فڕۆکەى بێ فڕۆکەوان لەماوەى ٢٤ کاتژمێردا لە عێراقەوە بەرەو ئیسرائیل هەڵدراون.
بەرپرسانی ئەمریکا ئەوەشیان ئاشکراکردووە، کە بەشێک لەو هێرشانەى بە فڕۆکەى بێ فڕۆکەوان لە عێراقەوە لەلایەن گروپە چەکدارەکانى نزیک لە ئێران ئەنجام دەدرێن، بەمەش ئەمەریکا و هاوکارانى ناچارکردبوون هاوکاریی لە خستنە خوارەوەیان بکەن.
ئەمە لەکاتێکدایە، بەیانى ئەمڕۆ مقاوەمەى ئیسلامى لە عێراق ئەنجامدانى هێرشێکى بە فڕۆکەى بێ فڕۆکەوان بۆسەر ئامانجێک لە باکورى ئیسرائیل راگەیاند و جەختیش لە بەردەوامیی هێرشەکان دەکەنەوە.