کۆمەڵەی زەحمەتکێشانی کوردستان داوا دەكات کومیتەی بەرێوەبەریی هاوبەشی هەمو حیزبەکانی رۆژهەڵاتی کوردستان پێكبهێنرێت تا بتوانن وەڵامی شایستە به داخوازی بەرینی خەڵکی کوردستان بۆ یەکگرتویی حێزبەکان بدەنەوە.
ئاوێنە: بەپێی راگەیەندراوێكی كۆمەڵەی زەحمەتكێشانی كوردستان، ئەمڕۆ یەکشەممە، کۆبونەوەی بەرفراوانی کومیتەی ناوەندیی ئەو حزبە سەبارەت بە شەڕی نێوان ئیسرائیل و کۆماری ئیسلامی و گۆڕانکیاریەکانی ڕۆژهەڵاتی ناوەڕاست و ئەگەرەکان و بەتایبەت دۆخی رۆژهەڵاتی کوردستان بەرێوەچوە.
لە راگەیەندراوەكەدا هاتوە"بە گرنگمان زانی لەم قۆناغەدا هەمو حێزب و رێکخراوە سیاسیەکان دور لە هەر جۆرە کێشە و جیاوازییەک، بە ئەرکی خۆیان هەستنەوەو پلان و بەرنامەی هاوبەش و گونجاویان هەبێ تا بە کۆدەنگی و یەکگرتوانە بزاڤی خەڵکی کوردستان رێبەری بکەن."
هەروەها كۆمەڵە وتوشیەتی"کومیتەی ناوەندی جەختی لە سەر پێکهێنانی کومیتەی بەرێوەبەریی هاوبەشی هەمو حیزبەکانی رۆژهەڵاتی کوردستان نیشتەجێ لە باشور کردەوە تا بتوانن وەڵامی شایستە به داخوازی بەرینی خەڵکی کوردستان بۆ یەکگرتویی حێزبەکان بدەنەوە و بە کەمترین خەسار، ئەم قۆناغەی بزاڤی ڕزگاریخوازی کوردستان تێپەرێنن."
هێمای بۆ ئەوەش كردوە، هەرلەمبارەوە کۆمەڵەی زەحمەتکێشانی کوردستان بە زوترین کات پلاتفۆرمی پێشنیارکراوی خۆی پێشکەشی حیزبەکان دەکات."