محەمەد شیاع سودانی، سەرۆك وەزیرانی عێراق چەند بڕیارێكی بۆ پەرەپێدانی سیستم و خزمەتگوزارییەكانی پارەدانی ئەلیكترۆنی راگەیاند و كە بەپێی بڕیارەكان دەبێت تاوەكو 1ی تەمموزی ساڵی داهاتو پارەدان بەشێوەی كاش لە دامەزراوە حكومییەكان نەمێنێت و هەروەها كاریش بكرێت بۆ بە بانكیكردنی موچەی كارمەندانی كەرتی تایبەت.
ئاوێنە: نوسینگەی سەرۆك وەزیرانی عێراق، ئەمڕۆ دوشەممە لە راگەیەندراوێكدا وتی، لە سۆنگەی جێبەجێکردنی بەرنامەی چاکسازی دارایی و ئابوری، کە یەکێکە لە گرنگترین ئەولەویەتەکانی حکومەت، محەمەد شیاع سودانی سەرۆک وەزیرانی عێراق بڕیاریدا بە گرتنەبەری چەند هەنگاوێک بۆ پتەوکردن و پەرەپێدانی سیستەم و خزمەتگوزارییەکانی پارەدانی ئەلیکترۆنی.
بەپێی راگەیەندراوەكە سودانی بڕیاریداوە كاربكرێت لەسەر بە بانكیكردنی موچەی کارمەندانی کەرتی تایبەت هاوشێوەی کەرتی حکومی و هەر یەکە لە وەزارەتی کار و کاروباری کۆمەڵایەتی و بانکی ناوەندیی عێراق، بە بەشداریی ژمارەیەک لە دامەزراوەكانی کەرتی تایبەت، راسپێردراون بۆ ئامادەكردنی میکانیزمێکی گونجاو بۆ ئەو مەبەستە.
سودانی بڕیاریشی داوە كە وەزارەتەکان و سەرجەم دامودەزگاکانی حکومەت دەستبەرداری پارەدانی نەختینە (کاش) بن و پارەدانی ئەلیکترۆنی بەکار بهێنن لە پارەدان و مامەڵە پەیوەندیدارەکانی تردا، ئەمەش لەرێگەی پلانێکی یەکخراوەوە كە هەر وەزارەتێک یان دامەزراوەیەکی حکومی بەرلە 31ی کانونی یەکەمی 2024 پێشکەشی دەكات، بەشێوەیەك دوایین وادە بۆ دەستپێكردنی جێبەجێكردنی پلانەكە بەشێوەیەكی كردەیی لە رۆژی 1ی تەمموزی 2025 تێپەڕنەكات.