لە سایەی هەڕەشەكانی دۆناڵد ترەمپ، سەرۆكی ئەمریكا لەبارەی نەوتی روسی و لەبارەی ئێران، ئێوارەی ئەمڕۆ دوشەممە، نرخی نەوت زیاتر لە لەسەدا یەك بەرزبوەوە، بەوەش بەرزترین نرخی خۆی لەماوەی پێنج هەفتەی رابردودا تۆماركرد.

ئاوێنە: لە ئێستادا نرخی یەك بەرمیل نەوتی خاوی برێنت بە 74 دۆلار و 71 سەنت و هەروەها نرخی یەك بەرمیل نەوتی تەكساس بە 71 دۆلار و 19 سەنت مامەڵەی پێوە دەكرێت.

لە ماوەی پێنج هەفتەی رابردودا ئەوە بەرزترین نرخی نەوتە كە تۆماردەكرێت.

بەرزبونەوەی نرخی نەوت دوای ئەوە هات كە دوێنێ یەكشەممە، ترەمپ رایگەیاند، "تۆڕە"یە لە ڤلادیمیر پوتین، سەرۆكی روسیاو ئەگەر هەست بكات مۆسكۆ بەربەست بۆ هەوڵەكانی لەپێناو كۆتاییهێنان بە شەڕی ئۆكرانیا دروست دەكات، ئەوا پێناسی گومرگی لاوەكی بە رێژەی لەسەدا 25 تا لەسەدا 50 بەسەر كڕیارانی نەوتی روسیدا دەسەپێنێت.

ترەمپ هەر دوێنێ رایگەیاند، ئێران بۆردومان ئەكرێت، ئەگەر لەگەڵ ئەمریكا نەگاتە رێككەوتنێكی نوێ لەبارەی بەرنامە ئەتۆمییەكەی و هەروەها پێناسی گومرگی لاوەكیش بەسەر كڕیارانی نەوتی ئێراندا دەسەپێنێت.