هەپەگە ڕایگەیاند، سەرەڕای ئاگربەست، هێرشەکانی سوپای توركیا بۆ سەر گەریلا بەردەوامن و لە ماوەی سێ ڕۆژی رابردودا زیاتر لە هەزار و 500 هێرشی ئەنجامداوە. دەشڵێت، هێزەکانی گەریلاش لە چوارچێوەی پاراستنی ڕەوادا وەڵامی هێرشەکان دەدەنەوەو درۆنیک خراوەتە خوارەوە.

ئاوێنە: ناوەندی ڕاگەیاندن و چاپەمەنیی هێزەکانی پاراستنی گەل-هەپەگە، ئەمڕۆ چوارشەممە، لە راگەیەندراوێكدا وتی، ڕۆژی 14ـی نیسان ناوچەی ڕۆژئاوای زاپ سێ جار لەلایەن فڕۆکە جەنگییەکانی توركیاوە بۆردومان کراوە.

راشیگەیاندوە، ڕۆژانی 13 و 14 و 15ی ئەم مانگە، ناوچەكانی خواکورک، گارە، مەتینا، رۆژئاوای زاپ، بە گشتی هەزار و 514 جار بە چەکی قورس و تۆپ و هاوەن بۆردومان كراون.

هەپەگە لە کۆتایشدا وتوشیەتی: ڕۆژی 14ـی نیسان لە دژی تونێلەکانی گەریلا لە ڕۆژئاوای زاپ، بە ئامانجی هێرشکردن درۆنیک نێردرا، هێزەکانی یەژاستارمان بە چەکی تاکەکەسی فڕۆکە بێفڕۆکەوانەکەیان خستە خوارەوە.