بەڕێوەبەرایەتی نەهێشتنی ماددە هۆشبەرەكان سەربە ئاسایشی گشتی هەولێر رایگەیاند، لەناو هەولێر دەستیان بەسەر نزیكەی 6 كیلۆگرام ماریجوانادا گرتوە لەگەڵ دەستگیركردنی تۆڕێكی بڵاوكردنەوەو بازرگانیكردن بە ماددەی هۆشبەر كە ئافرەتیان بەكاردەهێنان بۆ فێركردنی منداڵ و لاوی پارەدار.

ئاوێنە: بەڕێوەبەرایەتییەكە لە راگەیەندراوێكدا وتویەتی، لەناو شاری هەولێر توانیویانە تۆرێکی بڵاوکردنەوە و بازرگانیکردن بەماددەی هۆشبەر لەجۆری ماریجوانا دەستگیربکەن و دەستیش بگرن بەسەر نزیکەی 6 کیلۆگرام مەریجوانادا.

بەپێی راگەیەندراوەكە، تۆڕەكە لە 5 كەس پێكهاتون و ئاماژە بەوەشدراوە، دەستگیرکردنی ئەم تۆڕە تەواوکەری تۆڕێكی پێشترە کە تیایدا دو تۆمەتبار و نزیکەی 1 کیلۆگرام لەهەمان ماددە دەستی بەسەردا گیرا بو .

لە راگەیەندراوەكەدا هاتوە"ئەم تۆڕە مەترسیدارییەکەیان لەوەدا بو کە پێکهاتەکەیان لەکەسانی عەرەب و کورد بون و ئافرەتیان بەکاردەهێنا بۆ فێرکردنی منداڵ و گەنج و لاوی پارەدار و پاشان فرۆشتنی ئەم ماددەهۆشبەرە پێیان بەو نرخەی کە خۆیان دەیانویست."

ئەوەش خراوەتەڕو، دۆسیەی تاوان بۆتەواوی دەستگیکراوان کراوەتەوەو بەپێی یاسای بەرەنگاربونەوەی ماددەهۆشبەرەکان و کارتێکەرە ئەقڵییەکان مامەڵەیان لەگەڵدا دەکرێت.