وتەبێژی وەزارەتی دەرەوەی ئێران رایگەیاند، ئێوارەی ئەمڕۆ هەینی، عەباس عراقچی، وەزیری دەرەوەی ئێران بە سەرۆكایەتی وەفدێكی دیپلۆماسی و تەكنیكی بۆ درێژەدان بە دانوستانەكان لەگەڵ ئەمریكا بەرەو مەسقەتی پایتەختی عومان بەڕێدەكەوێت.
ئاوێنە: ئیسماعیل بەقایی، وتەبێژی وەزارەتی دەرەوەی ئێران لە لێدوانێكدا بۆ رۆژنامەنوسان وتیشی، بەپێی ئەو بەرنامەیەی كە لەلایەن عومان و بە رێككەوتنی ئەمریكاو ئێران دانراوە، سبەی شەممە، گفتوگۆی تەكنیكی لەنێوان تیمەكانی هەردولا و هەروەها دانوستانی ناڕاستەوخۆ لەنێوان وەزیری دەرەوەی ئێران و نوێنەری تایبەتی كۆشكی سپی بەڕێوەدەچێت.
ئیسماعیل بەقایی وتیشی، بەرەوپێشچون لە دانوستانەكان، بەندە بە نیشاندانی نیازپاكی، جددی بون و واقیعبینی لە لایەن ئەمریكاوەو ئاماژەی بەوەشداوە كە وەفدی ئێرانی بە لەبەرچاوگرتنی پێشینە و ئەزمونەكانی رابردو، هەر هەنگاوێكی خۆی بە ئاگاداربون لە رەفتاری لایەنی ئەمریكی دەنێت.