سەرلەبەیانی ئەمڕۆ هەینی، نرخی نەوت بەرزبونەوەی بەخۆیەوە بینی، ئەوەش لەدوای ئەوەی كە چین رایگەیاند، كراوەن بۆ ئەنجامدانی دانوستان لەگەڵ ئەمریكا لەبارەی باجە گومرگییەكان.
ئاوێنە: سەرلەبەیانی ئەمڕۆ هەینی، نرخی نەوت لە بازاڕەكانی جیهاندا بەرزبونەوەی بەخۆیەوە بینی، بەشێوەیەك كە لە ئێستادا نرخی یەك بەرمیل نەوتی برێنت بە 62 دۆلار و 20 سەنت و نرخی یەك بەرمیل نەوتی تەكساس بە 59 دۆلار و 31 سەنت مامەڵەی پێوەدەكرێت.
بەرزبونەوەی نرخی نەوت دوای ئەوە هات كە چین ئامادەیی وڵاتەكەی بۆ دانوستان لەگەڵ ئەمریكا لەبارەی باجە گومرگییەكان راگەیاند، ئەوەش هیواكانی بۆ هێوربونەوەی شەڕی بازرگانی نێوان ئەو دو وڵاتە بوژاندۆتەوە كە دو گەورەترین ئابوری و بەكارهێنەری نەوتن لە جیهاندا.
وێڕای ئەوەش هەڕەشەكانی ترەمپ بۆ سەپاندنی سزای لاوەكی بەسەر كڕیارانی نەوتی ئێرانیدا، پاڵپشتی لە بەرزبونەوەی نرخی نەوت كرد.