رێباز حەملان، یاریدەدەری سەرۆك وەزیرانی هەرێمی كوردستان رایگەیاند، رۆژی یەکشەممەی داهاتو لیستی موچەی مانگی ئایار ڕەوانەی بەغدا دەکرێت و پێشبینی دەکرێت پێش جەژن موچەی موچەخۆرانی هەرێم ڕەوانە بکرێت. دەشڵێت: یەكێتی ئاگاداری هەمو وردەکارییەکانی ئەو گرێبەستانەیە كە لە واشنتن ئیمزاكران.
ئاوێنە: رێباز حەملان، یاریدەدەری سەرۆک وەزیرانی هەرێمی کوردستان، ئەمڕۆ پێنجشەممە، بە میدیای پارتی راگەیاند، ئەو گرێبەستانەی لە واشنتن کراون نوێ نین، بەڵکو ڕێککەوتنەکان دەگەڕێنەوە بۆ 15ساڵ لەمەوبەر و کێڵگەکان دراون بە دو کۆمپانیای نوێ.
ڕێباز حەملان وتیشی: عێراق یاسای نەوت و گازی نییە تاوەکو بڵێت ئەم گرێبەستانە نایاسایین، وەزارەتی دەرەوەی ئەمەریکا پشتیوانی ئەم گرێبەستانە دەکات عێراق ناتوانێت بەربەست بۆ ئەم گرێبەستانە دروست بکات و ڕاگەیاندراوەکەی وەزارەتی نەوتی عێراق تەنیا لە چوارچوەی ڕاگەیاندراو دەمێنێتەوە.
یاریدەدەری سەرۆک وەزیران وتیشی: سەرۆک وەزیران مەسروربارزانی لەکاتێکی هەستیار سەردانی ئەمەریکا کرد و یەکێتیی نیشتیمانی کوردستان ئاگاداری هەمو وردەکارییەکانی گرێبەستەکەیە، ئەم گرێبەستانە دەبنە هۆی بوژانەوەیەکی گەورەی ئابوری لە هەرێمی کوردستان، دەبێتە هۆی زیادبونی هەلیکار و ڕاکێشانی غازی ماڵان و بوژانەوەی ئابوری.
دەربارەی موچەی مانگی ئایار، ڕێباز حەملان باسی لەوەکرد، ڕۆژی یەکشەممە لیستی موچەی مانگی ئایار رەوانەی بەغدا دەکرێت پێشبینی دەکرێت تاوەکو پێش جەژنی قوربان موچەی مانگی ئایار بدرێت.