بافڵ تاڵەبانی، سەرۆكی یەكێتی لەگەڵ وەفدێكی پەرلەمانی ئەوروپا و نوێنەری دەم پارتی لە كۆنسەی ئەوروپا كۆبوەوەو تاوتوێی پرۆسەی چارەسەرییان لە باکوری کوردستان و تورکیا كرد.
ئاوێنە: نوسینگەی سەرۆكی یەكێتی، ئەمڕۆ دوشەممە، لە راگەیەندراوێكدا وتی، بافڵ تاڵەبانی لە دەباشان پێشوازی لە وەفدێکی پەرلەمانی ئەوروپا بە ئەندامێتی مارتن شیردڤان، هاوسەرۆکی چەپەکان لە پەرلەمانی ئەوروپا و فایەق یاگزای، نوێنەری دەم پارتی لە کۆنسەی ئەوروپا کرد.
بەگوێرەی راگەیەندراوەكە، لە دیدارێکدا دۆخی سیاسیی ناوچەکە و نوێترین پێشهاتەکان تاوتوێکران و هەماهەنگی و هاریکاریی هەمو لایەنەکان بۆ چارەسەرکردنی کێشەکان بە گرنگ زانرا.
وەك لە راگەیەندراوەكەدا هاتوە، پرۆسەی چارەسەری لە باکوری کوردستان و تورکیا گفتوگۆی لەبارەوەکرا و بافڵ تاڵەبانی رایگەیاند، هەر لە سەرەتاوە لەگەڵ ئەوەدابوین کە بژاردەی گفتوگۆ بگیرێتەبەر بۆ گەیشتن بە ئاشتی و چارەسەری ناکۆکییەکان و بۆ سەرخستنی ئەم دەرفەتەش هاریکاربوین و بەردەوامیش دەبین لە هەماهەنگییەکانمان.