نوسینگەی بافڵ تاڵەبانی، سەرۆكی یەكێتی رایگەیاند، ئیدانەی ئەو هێرشانەی سەر ئێران دەكەین كە بونەتە هۆی زیادكردنی ئاڵۆزییەكانی ناوچەكەو داوا لە کۆمەڵگەی نێودەوڵەتی دەکەین هەنگاوی راستەوخۆ بنێت بۆ رێگریکردن لە پەرەسەندنی زیاتر.
ئاوێنە: نوسینگەی بافڵ تاڵەبانی، سەرۆكی یەكێتی، كەمێك لەمەوبەر لە راگەیەندراوێكدا وتی"ئیدانەی ئەو هێرشانەی سەر ئێران دەکەین کە بونەتە هۆی زیادکردنی ئاڵۆزییەکانی رۆژهەڵاتی ناوەڕاست و لەهەمانکاتدا پێشێلکارییەکی ئاشکرای سەروەری عیراقیشە."
ئاماژەی بەوەشداوە "ئەمەی ئێستا رودەدات تەنها کارێکی بێباکانە نییە، بەڵکو بەئامانجگرتنی بەئەنقەست و پەکخستنی ئەو دەستپێشخەرییە دیپلۆماسییانەیە کە سەرۆک دۆناڵد ترەمپ دەستیپێکردون."
ئەوەشی خستۆتەڕو"هەوڵەکانی ئیدارەکەی دۆناڵد ترەمپ بۆ رۆژهەڵاتێکی ناوەڕاستی هاوسەنگ و سەقامگیر، لەڕێگەی گفتوگۆ و دیالۆگەوە بونەتە هۆی دانانی بناغەیەک بۆ بەرەوپێشچون بۆ داهاتو، ئەم کارانەش هێرشێکی راستەوخۆن بۆسەر ئەم هەوڵانە."
نوسینگەی سەرۆكی یەكێتی وتوشیەتی"پرسە و سەرەخۆشی خۆمان ئاڕاستەی کەسوکاری ئەو کەسانە دەکەین کە لەم هێرشانەدا گیانیان لەدەستداوە بەتایبەت سڤیلەکان، کە بەم ئازارە قورس و سەختەدا تێپەڕدەبن."
هەروەها داواشی لە کۆمەڵگەی نێودەوڵەتی كردوە، هەنگاوی راستەوخۆ بنێت بۆ رێگریکردن لە پەرەسەندنی زیاتر. خەڵکی رۆژهەڵاتی ناوەڕاست پێویستی بە ئاشتییەکی هەمیشەیی هەیە ئەمەش تەنها لەرێگای دیالۆگ و گفتوگۆوە دەستدەکەوێت.
لە كۆتاییشدا وتویەتی"جەخت لەوەش دەکەینەوە کە هەرێمی کوردستان ئارام و سەقامگیر بێت و بە ئاشتی بمێنێتەوە. هەمو هەوڵەکانمان دەخەینەگەڕ بۆ دڵنیابونەوە لە پارێزگاریکردن لە خەڵکەکەمان و ئەو سەقامگیرییەی کە زۆر بە جددی کارمان بۆ کردوە، تەنانەت لەو کاتانەشدا کە ئاڵۆزی چواردەوری گرتوین."
دەقی راگەیەندراوەكەی نوسینگەی سەرۆکی یەکێتیی نیشتمانیی کوردستان:
ئیدانەی ئەو هێرشانەی سەر ئێران دەکەین کە بونەتە هۆی زیادکردنی ئاڵۆزییەکانی رۆژهەڵاتی ناوەڕاست و لەهەمانکاتدا پێشێلکارییەکی ئاشکرای سەروەری عیراقیشە.
ئەم کارانە بنچینەکانی یاسا و رێسا نێودەوڵەتییەکان لاوازدەکەن و دەبێتە هۆی ئەوەی مەترسییەکی زیاتر بخاتەسەر ئەو بارودۆخە هەستیارەی کە لە ناوچەکەدا هەیە.
ئەمەی ئێستا رودەدات تەنها کارێکی بێباکانە نییە، بەڵکو بەئامانجگرتنی بەئەنقەست و پەکخستنی ئەو دەستپێشخەرییە دیپلۆماسییانەیە کە سەرۆک دۆناڵد ترەمپ دەستیپێکردون.
هەوڵەکانی ئیدارەکەی دۆناڵد ترەمپ بۆ رۆژهەڵاتێکی ناوەڕاستی هاوسەنگ و سەقامگیر، لەڕێگەی گفتوگۆ و دیالۆگەوە بونەتە هۆی دانانی بناغەیەک بۆ بەرەوپێشچون بۆ داهاتو، ئەم کارانەش هێرشێکی راستەوخۆن بۆسەر ئەم هەوڵانە.
پرسە و سەرەخۆشی خۆمان ئاڕاستەی کەسوکاری ئەو کەسانە دەکەین کە لەم هێرشانەدا گیانیان لەدەستداوە بەتایبەت سڤیلەکان، کە بەم ئازارە قورس و سەختەدا تێپەڕدەبن.
داوا لە کۆمەڵگەی نێودەوڵەتی دەکەین هەنگاوی راستەوخۆ بنێت بۆ رێگریکردن لە پەرەسەندنی زیاتر. خەڵکی رۆژهەڵاتی ناوەڕاست پێویستی بە ئاشتییەکی هەمیشەیی هەیە ئەمەش تەنها لەرێگای دیالۆگ و گفتوگۆوە دەستدەکەوێت.
جەخت لەوەش دەکەینەوە کە هەرێمی کوردستان ئارام و سەقامگیر بێت و بە ئاشتی بمێنێتەوە. هەمو هەوڵەکانمان دەخەینەگەڕ بۆ دڵنیابونەوە لە پارێزگاریکردن لە خەڵکەکەمان و ئەو سەقامگیرییەی کە زۆر بە جددی کارمان بۆ کردوە، تەنانەت لەو کاتانەشدا کە ئاڵۆزی چواردەوری گرتوین.
نوسینگەی سەرۆکی یەکێتیی نیشتمانیی کوردستان