ئەندامێکی ئەنجومەنی نوێنەرانی عێراق رایدەگەیەنێت، “نەناردنی مووچە لەلایەن بەغدادەوە بیانووە”.
ئاوێنە: سروە محەمەد، ئەندامی ئەنجومەنی نوێنەرانی عێراق، رایگەیاند، بەپێی بڕیار و رێککەوتنەکان دەبێت تاوەکو ئەنجامدانی هەڵبژاردنی ئەنجومەنی نوێنەران و پێکهێنانی حکومەتی نوێ، ئەم حکومەتەی ئێستای عێراق مووچە بە مووچەخۆران بدات بە هەرێمی کوردستانیشەوە.
وتیشی، نەناردنی مووچەی هەرێمی کوردستان لەلایەن بەغدادەوە بیانووە و دەیانەوێت بەو بیانووانە مووچەکە نەنێرن.
سروە محەمەد باسی لەوەشکرد، لەناو ئەنجومەنی نوێنەران کە باسی کێشە یان بابەتێکی یاسایی دەکرێت کاتێک شتێک لە بەرژەوەندیی خۆیان بێت پێمان دەڵێن بڕیاری دادگای فیدراڵیی عێراق پابەندکەرە و هەڵناوەشێتەوە، بەڵام ئەوەی پەیوەندیی بە هەرێمەوە هەبێت دەڵێن پابەندکەر نییە.