یسرائیل كاتز، وەزیری بەرگریی ئیسرائیل رایگەیاند، خەریكی دانانی پلانێكی جێبەجێكردنن كە دڵنیابن لەوەی ئێران نەتوانێت ئەو توانایانەی بەدەستبهێنێتەوە كە لە جەنگی 12 رۆژەی نێوان هەردو وڵاتدا لەدەستی داون و هەڕەشە لە ئیسرائیل بكاتەوە.
ئاوێنە: بەپێی میدیای رەسمی ئیسرائیل، یسرائیل كاتز، وەزیری بەرگریی ئیسرائیل ئەو قسانەی لە كۆبونەوەیدا لەگەڵ فەرماندە باڵاكانی سوپای وڵاتەكەی كردون.
وەزیری بەرگریی ئیسرائیل جەختی كردۆتەوە كە سوپای ئیسرائیل دەبێت لەڕوی هەواڵگریی و ئۆپەراسیۆنیشەوە، توانای تەواوەتی هەبێت بۆ ئەوەی پارێزگاریی لە باڵادەستبونی بەسەر ئاسماندا بكات و رێگر بێت لەوە ئێران تواناكانی پێشوی خۆی بەدەستبهێنێتەوە.
دوێنێ میدیای حكومەتی ئیسرائیل بەبێ ناوهێنانی هیچ سەرچاوەیەك ئاماژەی بەوەدا كە ئیسرائیل لە پەیوەندیدایە لەگەڵ ئەمریكا بۆ دانانی پلانێكی جێبەجێكردن لەبارەی بەرنامە ئەتۆمییەكەی ئێران كە پلانەكە هاوشێوەی لێكتێگەیشتنی ئەمریكاو ئیسرائیلە لەبارەی ئاگربەستەكەی مانگی 11ی ساڵی رابردوی لوبنانەوە.
رێككەوتنی ئاگربەستەكەی لوبنان رێگە بە ئیسرائیل دەدات لە حاڵەتی دەستنیشانكردنی بونی هەر هەڕەشەیەك لەلایەن حزبوڵاوە، دەستوەردانی سەربازی بكات.