حكومەتی فیدڕاڵی بۆ ناردنی موچەی فەرمانبەرانی هەرێمی کوردستان مەرجی هەیە و سەرۆکى فراکسیۆنى یەکێتیش لە پەرلەمانی عێراق ڕایگەیاند، "ناردنى موچەى موچەخۆران پەیوەستە بە ناردنى 120ملیار دیناری داهاتی ناوخۆ و هەناردەی ئەو بڕەی نەوتی هەرێم کە لە لێکتێگەیشتنەکەدا دیاریکراوە".
ئاوێنە: هەرێم کەمال ئاغا، سەرۆکی فراکسیۆنی یەکێتی لە پەرلەمانی عێراق بە میدیای فەرمی حزبەكەی ڕایگەیاند، بەپێی یاسای بودجە پێویستە هەرێم 400 هەزار بەرمیلی رۆژانە هەناردە بکات، بەڵام لە لێکتێگەیشتنەکەی ئەمجارەدا، پێویستە هەرێم رۆژانە 230 هەزار بەرمیل نەوت لە رێگای سۆمۆوە هەناردە بکات.
ئاماژەی بەوەشكرد، بەهۆى هێرشە درۆنییەکانی ماوەكانی رابردو بۆ سەر هەرێم، بەغدا رەزامەندیى نیشانداوە بڕى ئەو نەوتەى بەرهەمهاتوە هەناردە بکرێتەوە، جا بڕەکەی هەرچەندێک بێت.
پەیوەست بە لیژنەی لێکۆڵینەوە لە هێرشە درۆنییەکان بۆ سەر کێڵگە نەوتییەکان کە حکومەتى عێراق پێکیهێناوە، هەرێم کەمال ئاغا رایگەیاند، لیژنەکە راپۆرتى خۆی تەواوکردوە و لەگەڵ لیژنەى ئەمنیى هەرێمى کوردستان کۆبونەوەیەک دەکات و راپۆرتەکەی بۆ سەرۆکوەزیرانی عێراق بەرزدەکاتەوە.
دەشڵیت، بەگوێرەی بڕیارى سەرۆکوەزیران، پێویستە لیژنەکە دەرئەنجامى لێکۆڵینەوەکانی بۆ راى گشتیی ئاشکرابکات.