شارەزایەكی بواری ئابووریی ڕایدەگەیەنێت: نرخی دینار بەرانبەر بە دۆلار بەردەوام لەژێر کاریگەریی لێدوان و گرژییە سیاسییەکاندایە، ئەمەش کاریگەرییەکی نەرێنی کردووەتە سەر نرخی دینار، دەشڵێت: هەمیشە لەم کاتانەی ساڵ نرخی دینار دادەبەزێت، بەڵام کاتییە و زۆر بەردەوام نابێت.
ئاوێنە: دكتۆر خالید حەیدەر، مامۆستای بەشی ئابووریی لە زانكۆی سلێمانی و شارەزای بواری ئابووریی لەبارەی ئەگەری بەرزكردنەوەی بەهای دۆلار بەرانبەر دینار ڕایگەیاند، نرخی دینار بەرانبەر بە دۆلار بەردەوام لەژێر کاریگەریی قسە و گرژییە سیاسییەکاندایە، ئەمەش کاریگەرییەکی نەرێنی کردووەتە سەر نرخی دینار.
وتیشی: هۆکارێکی دیکەی دابەزینی نرخی دینار ئەوەیە، کە عێراق لە سەرەتای ساڵی داراییدایە، هەمیشە لەم کاتانەی ساڵ نرخی دینار دادەبەزێت، بەڵام کاتییە و زۆر بەردەوام نابێت.
باسی لەوەشكرد، پێشتر بانکی ناوەندیی عێراق رایگەیاندبوو کە بەهای دۆلار دادەبەزێنێت، بەڵام بە بۆچوونی شارەزایان جێبەجێکردنی ئەم بڕیارەی بانکی ناوەندیی عێراق سەخت دەبێت.
ڕاشیگەیاند: بۆیە ئەگەر هەیە بەهای جێگیرکراوی دۆلار لە یاسای بودجەی ساڵی ٢٠٢٦ زیادبکرێت و نرخی یەك دۆلار بە ١٥٠٠ دینار بۆ ١٦٠٠ دینار جێگیربکرێت، ئەگەر ئەمەش جێگیربکرێت قورساییەکی زۆر دەکەوێتە سەر شانی هاوڵاتییان.
ئەوەش لەكاتێكدایە، لە ئێستادا ١٠٠ دۆلار بەرانبەر بە ١٥٠ هەزار دینار مامەڵەی پێوەدەكرێت.