پاش ئەوەی پەرلەمانتارێکی پارتی لە عێراق رایگەیاند، کە حزبەکەی بڕیاریداوە ئەمشەو لەبارەی نەوتەوە ئامادەی کۆبوونەوەی پەرلەمان نەبێت و بە "نایاسای"ی وەسفکردووە، لەبەرامبەردا ئەندامێکی فراکسیۆنی یەکگرتووش لە ناوەند ئەوە ئاشکرا دەکات کە "ئێستا پەرلەمانی عێراق بە بەشداریکردنی سوننە و شیعە دەتوانن بڕیار لە هەناردەکردنەوەی نەوت بدەن، بەڵام بڕیارەکە بۆ هەرێم توند دەبێت".
ئاوێنە: جەمال کۆچەر، ئەندامی پەرلەمانی عێراق لەسەر فراکسیۆنی یەکگرتووی ئیسلامی لەبارەی ئەوەی ئایا بە ئامادەنەبوونی پارتی لە کۆبوونەوەی پەرلەمان؛ بڕیار لەهەناردەکردنەوەی نەوت دەدرێت؟ ئەو تایبەت بە ئاوێنەی وت "ئامادەنەبوونی هیچ لایەنێکی سیاسی کاریگەری لەسەر بڕیادانی پەرلەمانی عێراق نابێت، بەڵکو نیسابی یاسایی تەواو بێت بەتایبەت سوننە و شیعە؛ ئەوا کورد کەمینەیە".
سەبارەت بە ئامادەنەبوونی وەزیری سامانە سروشییەکانی هەرێم چی روودەدات؟ ئەو نەیشاردەوە کە بەئامادەنەبوونی وەزیری سامانە سروشتییەکان بەغدا بڕیاری توندتر دەدات، بەڵام "ئامادەبوونیان باشترە و نەرمی و لێکتێگەیشتنیان زیاتر دەبێت، بەڵام بەپێچەوانەوە ئەوا حکومەتی عێراق وا هەست دەکات هەرێم رێزیان بۆ دانانێت".
بەپێی پەیڕەوی ناوخۆی پەرلەمانی عێراق پێویستە دەستەی سەرۆکایەتی پەرلەمانی عێراق کە لە سەرۆکی پەرلەمان و هەردوو جێگرەکەی پێکدێت؛ رەزامەندی بدەن لەسەر کارنامەی دانیشتنەکانی پەرلەمان، بەڵام جێگری دووەمی سەرۆکی پەرلەمانی عێراق کە پشکی کوردە رەزامەندی نەداوە.
لەوبارەیەوە ئاوێنە پرسی کە ئایا ئەو پەیڕەوە تاوەکو ئێستا کاری پێدەکرێت؟ جەمال کۆچەر دەڵێت "جاران وابوو کە هەر لایەنێک بەشدار نەبێت کۆبونەوە ناکرێت، چونکە خولی پێشوو هەرێم تەنازولیان کرد بۆ گۆڕینی سەرۆکی پێشووی پەرلەمان کە محەمەد حەلبوسی بوو. واتە جاران پەرلەمان دەسەڵاتی سەرۆکایەتی بوو و هیچ نەدەکرا بەبێ ئەو دەسەڵاتە، بەڵام کاتی خۆی حەلبوسی داوایکرد کە بگۆڕدرێت و دەنگی لەسەر دراو تێپەڕی و ئێستا وەزیر دەتوانێت بەتەنیا ئەو بڕیارە بدات بە سەرۆکی سەرەکی نەک بڵێت جێگرەکەی".
دەربارەی گرفتەکانی بەردەم هەناردەی نەوت، ئەو پەرلەمانتارەی یەکگرتوو رایگەیاند "عێراق ئێستا بۆ هەناردەکردنەوەی نەوت پێویستی بە هاوکاری هەرێمە و وتویانە؛ دەرفەتێکمان بدەنێ بۆ ئەو کارەیە و دەرفەتیش بە هەرێم دەدەین کە بازرگانی خۆیان بکەن، بەڵام هەرێم قبوڵی نەکردووە. ئەوەش وا لە عێراق گەیشتووە کە هەرێم دەڵێت؛ کێشەی من نییە تۆ مووچەی هاوڵاتی خۆت بدەیت یاخود نا، بەڵام بەڕاستی ئەمە قورس دەکەوێت لەسەر هەرێم".
لەسەر ئەوەی ئایا ئەم لێکتێنەگەیشتنەی لەنێوان هەرێم و بەغدا دروست بووە گرفت بۆ رێککەوتنی فەرمی ئەو دوو حکومەتە دروست ناکات؟ ناوبراو ئاماژە بەوە دەکات کە ئەگەر ئەم بابەتە هەرێم "بەم نەفەسەی ئێستاوە" مامەڵە بکات، ئەو باوەڕی وایە "زۆر قورس" دەکەوێتەوە، وتیشی "چونکە عێراق لەتەنگەشەی وڵاتەکەیەتی دەرفەتی پێنادرێت نەوتی خۆی بفرۆشێت لەکاتێکدا هەرێم بەردەوامە لەفرۆشتنی نەوتی خۆی".
ئەو پەرلەمانتارە خاڵێکی گرنگ ئاشکرا دەکات و دەڵێت "لەگروپی پەرلەمانتارانی عێراق واژۆ کۆدەکرێتەوە بڕیارێک دەربکرێت یەک دینار بە هەرێم نەدرێت، ئەو کارەشیان زۆر بە جدییە".
پەیوەست بە مووچەی مانگی سێشەوە، جەمال کۆچەر وتی "لە بەیاننامەکەی ئەمڕۆی کاک مەسروردا نەرمەییەک نیشاندراوە، ئەگەر بەغدا ئەو نەرمییە لەبەرچاو بگرن ناکەوینە کێشەی مووچەی مانگی سێوە، بەڵام ئەگەر پێچەوانە بڕیار بدات (عێراق) زۆر توند دەبێت لەسەر هەرێم، لەوانەیە لەمەوبەدوا نەحکومەتی نوێ پێکبهێنرێت نە لەکێشەی مووچەش دەربچین".