کۆمپانیای دانا گاز کە پشکەکانی لە بازاڕی دوبەی تۆمارکراوە، وەک ڕێکارێکی خۆپارێزی، تەواوی کارمەندانی خۆی لە کێڵگەی غازی کۆرمۆر لە هەرێمی کوردستانی عێراق کشاندەوە.
ئاوێنە: سەرچاوە ئاگادارەکان بە "ئەل مۆنیتەر"یان ڕاگەیاندووە کە ئەم هەنگاوە دوای هەڕەشەکانی ئێران دێت بۆ هێرشکردنە سەر دامەزراوەکانی نەوت و غاز لە ناوچەی کەنداو، وەک تۆڵەسەندنەوەیەک لە هێرشە ئاسمانییەکەی ئیسرائیل بۆ سەر کێڵگەی غازی "پارس"ی باشوور.
لە بەیاننامەیەکدا کە ڕۆژی چوارشەممە لەلایەن ئاژانسی هەواڵی "تەسنیم"ی نیمچە فەرمیی ئێران بڵاوکراوەتەوە، دەسەڵاتدارانی ئێران ڕایانگەیاندووە کە پێنج دامەزراوە لە سعودیە، ئیمارات و قەتەر "لە کاتژمێرەکانی داهاتوودا دەکرێنە ئامانج".
دانا گاز لەگەڵ دەستپێکردنی ململانێی ئێران سێ هەفتە لەمەوبەر، کارەکانی ڕاگرت. کێڵگەی کۆرمۆر، کە زۆربەی غازی سروشتی هەرێمی کوردستان دابین دەکات، چەندین جار لەلایەن درۆنەکانەوە کراوەتە ئامانج کە پێدەچێت لەلایەن میلیشیا شیعەکانی سەر بە ئێرانەوە ئاراستە کرابن. وتەبێژی دانا گاز وەڵامی داواکاریی "ئەل مۆنیتەر"ی بۆ لێدوان نەدایەوە.
ئەم هەنگاوە لە کاتێکدایە کە وەزارەتی کارەبای عێراق ڕایگەیاندووە کە هەناردەی غازی ئێران ڕاوەستاوە بەهۆی ئەوەی ناوی ناوە "پەرەسەندنەکانی ناوچەکە". ئەمەش بە شێوەیەکی بەرچاو بەرهەمهێنانی کارەبا لە وڵاتدا کەم دەکاتەوە، بەجۆرێک نزیکەی ٣١٠٠ مێگاوات لە کار دەکەون.
عێراق، کە خاوەنی یەدەگێکی زەبەلاحی غازی سروشتی خۆیەتی، زۆر پشت بە غازی ئێران دەبەستێت بۆ کارپێکردنی وێستگەکانی کارەبا، بەتایبەتی لە باشوور.
ئێران نزیکەی سێیەکی پێداویستییەکانی وزەی عێراقی دابین دەکرد، کە بڕەکەی ٥٠ ملیۆن مەتر سێجا غاز بوو لە ڕۆژێکدا و ٦٠٠٠ مێگاوات کارەبای بەرهەم دەهێنا.
کێڵگەی پارسی باشوور کە لەلایەن ئیسرائیلەوە لێدرا، گەورەترین کێڵگەی غازی سروشتییە لە جیهاندا و لەگەڵ قەتەر هاوبەشە.
عێراق وەک یەکێک لەو وڵاتانە دەرکەوتووە کە زۆرترین زیانی بەرکەوتووە بەهۆی هێرشە هاوبەشەکانی ویلایەتە یەکگرتووەکانی ئەمریکا و ئیسرائیل دژی ئێران، کە لە ٢٨ی شوبات دەستیپێکرد. وڵاتەکە لەو کاتەوە نەیتوانیوە نەوتەکەی هەناردە بکات کە ئێران گەرووی هورموزی بەڕووی هاتوچۆی تانکەرەکاندا داخستووە، و لەو کاتەوە تەنها بەپێی بارودۆخ و ڕەزامەندی پێشوەختەی خۆی ڕێگە بە کەشتییەکان دەدات تێپەڕ بن.
نەوت ٩٠٪ی داهاتی عێراق پێکدەهێنێت. لە پێشکەوتنێکی نوێدا، بەغدا ڕۆژی سێشەممە لەگەڵ حکومەتی هەرێمی کوردستان گەیشتە ڕێککەوتن بۆ پەمپکردنی تا ٢٥٠ هەزار بەرمیل نەوتی خاو لە ڕێگەی بۆرییەکەوە کە لە کێڵگەکانی کەرکووکەوە بە خاکی هەرێمی کوردستاندا تێپەڕ دەبێت بەرەو وێستگەکانی بارکردن لە باشووری تورکیا.