سی ئێن ئێن ئاماژە بەوە دەکات بەپێچەوانەی ڕاگەیاندنەکانی دۆناڵد ترەمپ سەبارەت بە"لەناوبردنی توانای سەربازی" ئێران، ڕاپۆرتە نهێنییە نوێکانی دەزگا هەواڵگرییەکانی ئەمریکا ئاشکرای دەکەن کە ئێران ٥٠%ی جبەخانەکانی وەک خۆی ماوە، ئەمەش سەرەڕای هێرشی ڕۆژانەی هێرشەکانی ئەمریکاو ئیسرائیل بۆ سەر ئامانجە سەربازییەکان لەماوەی پێنج هەفتەی ڕابردوودا.
ئاوێنە: بەپیی راپۆرتی سی ئێن ئێن، سەرەڕای ئەنجامدانی زیاتر لە ١٢ هەزار هێرشی ئەمریکا، بنکە ژێرزەمینییە "نەبینراوەکان"و هەزاران فڕۆکەی بێفڕۆکەوان، دیدگای سەرکەوتنی خێرا لەماوەی دوو هەفتەدا وەک ترمپ بانگەشەی بۆ کردووە، دەکاتە سیناریۆیەکی تاڕادەیەک ناجێگیر.
سی ئێن ئێن باس لەوە دەکات کە کاربەدەستانی ئێران هێشتا توانای ئەوەیان هەیە ئاژاوەی ڕەها لە سەرتاسەری ناوچەکەدا دروست بکەن.
ئەو داتایانەی لەچەند ڕۆژی ڕابردوودا کۆکراونەتەوە، دەریانخستووە کە ڕێژەیەکی زۆر لەموشەکە کروزەکانی بەرگری کەناراوەکانی ئێران وەک خۆیان ماون، ئەمەش لەگەڵ بڕیارەکەی ئەمریکادا یەکدەگرێتەوە کە هەڵمەتی ئاسمانی خۆی لەسەر سەروەت و سامانی سەربازی کەناراوەکان چڕ نەکاتەوە، هەرچەندە کەشتییەکان دەکەنە ئامانج. ئەم مووشەکانە توانایەکی سەرەکین کە ڕێگە بە ئێران دەدات هەڕەشە لەکەشتیوانی لە گەرووی هورمز بکات.
ئەو زانیاریانە وێنەیەکی ئاڵۆزتر لە توانا بەردەوامەکانی ئێران پێشکەش دەکەن لەچاو هەڵسەنگاندنەکانی سەرکەوتنی سەربازی کە بە ئاشکرا لەلایەن سەرۆک دۆناڵد ترەمپ و بەرپرسانی ئیدارەی ئێرانەوە باس دەکرێن.
بەپێی ئامارەکانی فەرماندەیی ناوەندی ئەمریکا (سێنتکۆم)، تا ڕۆژی چوارشەممە، ئەمریکا زیاتر لە ١٢ هەزار و ٣٠٠ ئامانجی لە ناوخۆی ئێراندا پێکاوە. سەرچاوەکان ئاماژەیان بەوەشکردووە، هەرچەندە توانا سەربازییەکان دابەزیوە و سەرکردە سەرەکییەکان کوژراون- لەنێویاندا عەلی خامنەیی و عەلی لاریجانی، بەڵام ئێران ژمارەیەکی زۆر مووشەکی لە دەستدایە.
لە لێدوانە گشتییەکاندا، پنتاگۆن ئاماژەی بە کەمبوونەوەی کۆی گشتی مووشەکەکان کردووە، نەک ئەوەی لەناوبراون. پیت هێگسێت، وەزیری بەرگری ئەمریکا ڕایگەیاند، هێرشە موشەکی بالیستیکییەکان بە ڕێژەی ٩٠٪ کەمبوونەتەوە، هەروەها هێرشەکانی فڕۆکەی بێفڕۆکەوانیش کەمبوونەتەوە.
سی ئێن ئێن باس لەوە دەکات کە لەکاتێکدا ترپمو وەزیری بەرگرییەکەی دەڵێن هێزی دەریایی فەرمی ئێران لەناوچووە، بەڵام هێزەکانی سوپای پاسداران هێشتا ٥٠٪ی تواناکانیان دەپارێزن، بەسەدان بەلەمی بچووکی بێ سەرنشینیان لەبەردەستدایە کە دەتوانن کەشتیوانی هەراسان بکەن.
ڕۆژی چوارشەممە ترەمپ هێڵی کاتیی بۆ تەواوکردنی ئۆپەراسیۆنەکانی ئەمریکا لە ماوەی دوو بۆ سێ هەفتەدا دانا، بەڵام وەک سی ئێن ئێن دەڵێت "ئەوانەی پێداچوونەوەیان بەڕاپۆرتە هەواڵگرییەکاندا کردووە، ئەو ئامانجەیان بەناڕاستەقینە ناوبردووەو ئێران هەر رۆژەو کارتێکی نوێی بەرگری بەکاردەهێنێت".