پێگەی "تابناک"ی ئێرانی، ڕۆژی دووشەممە بڵاویکردەوە کە لە ماوەی ٢٤ کاتژمێری ڕابردوودا تەنها ١٥ کەشتی بە گەرووی هورمزدا تێپەڕیون، ئەمەش لە کاتی بوونی کۆتوبەندێکی توند لەسەر جووڵەی دەریاوانی.
ئاوێنە: ماڵپەڕەکە لە زاری سەرچاوەکانی دەریاوانییەوە ئاماژەی بەوە کردووە کە تێپەڕبوونی کەشتییەکان دوای وەرگرتنی مۆڵەت بووە لە لایەنی ئێرانی، لەگەڵ سەپاندنی ڕێکاری چاودێری بەسەر هاتووچۆی دەریایی لە ناوچەکەدا.
لە ڕاپۆرتەکەدا هاتووە کە ژمارەیەک کەشتی تا ئێستاش چاوەڕێی وەرگرتنی مۆڵەتی تێپەڕبوون دەکەن، لە کاتێکدا هەندێک لە کۆمپانیاکانی گواستنەوەی دەریایی پێیان باشترە گەشتەکانیان دوابخەن تا ئەو کاتەی دۆخی ئەمنی زیاتر ڕوون دەبێتەوە.
ئاماژەی بەوەش کردووە کە جووڵەی دەریاوانی لە گەرووەکەدا بە ڕێژەی ٩٠٪ کەمی کردووە بەراورد بەو ماوەیەی پێش هێرشکردنە سەر ئێران، ئەمەش ڕەنگدانەوەی ئەو دۆخە پڕ لە وریاییەیە کە کۆمپانیاکانی بارهەڵگری جیهانی گرتووەتەوە.
گەرووی هورمز بە یەکێک لە گرنگترین ڕێڕەوە دەریاییەکانی جیهان بۆ گواستنەوەی نەوت و گاز دادەنرێت، چونکە ڕێژەیەکی زۆری هەناردەی وزەی جیهانی پێدا تێپەڕ دەبێت، ئەمەش وا دەکات هەر پاشەکشەیەک لە جووڵەی دەریاوانی تێیدا کاریگەری ڕاستەوخۆی لەسەر بازاڕە جیهانییەکان هەبێت.
پێشتر ئاژانسی "بلومبێرگ" بڵاویکردبووەوە کە تانکەرێکی نەوت کە نەوتی خاوی عێراقی هەڵگرتبوو بە گەرووی هورمزدا تێپەڕیوە، ئەمەش دوای ئەوەی ئێران ڕایگەیاند کە بەدەرکردنێکی تایبەتی بە بەغداد بەخشیوە کە ڕێگە بە تێپەڕبوونی تانکەرەکانی دەدات سەرەڕای ئەو کۆتوبەندانەی خراونەتە سەر دەریاوانی.
ئەمەش دوای داخستنی گەرووەکە هات لە ئەنجامی هێرشە ئەمریکی-ئیسرائیلییەکان بۆ سەر ئێران، کە بووە هۆی کەمبوونەوەی هەناردەی عێراق و بەرزبوونەوەی نرخەکانی نەوت لەسەر ئاستی جیهان.