سەرکردەیەک لەچوارچێوەی هەماهەنگی ئاشکرای دەکات، چوارچێوەکەیان بە چڕی بۆ دیاریکردنی کاندیدێکی سەرۆکوەزیران لەکۆبوونەوەدایە، بەڵام چوارچێوەکە بە مەرجێک ئەو پۆستەیە یەکلا دەکاتەوە کە مالیکی و سودانی بکشێنەوە.

ئاوێنە: ئەمڕۆ شەممە، عەبدولرەحمان جەزائیری سەركردە لە چوارچێوەی هەماهەنگی، بە كوردستان24ـی راگەیاند "لە كاتژمێر 14:00، چوارچێوەی هەماهەنگی لە كۆبوونەوەدایە بۆ گفتوگۆ لەبارەی كاندید بۆ پۆستی سەرۆكوەزیرانی عێراق، بڕیارە كاتژمێر حەوت كۆبوونەوەیەكی دیكە بكرێت، كۆتایی بەو پرسە بهێنرێت".

جەزائیری مەرجێکی چوارچێوەی هەماهەنگی ئاشکرا دەکات و دەڵێت "مەرجی یەكلاكردنەوە سەرۆکوەزیران كشانەوەی نوری مالیكی و محەمەد شیاع سودانییە لە كاندیدبوون لەو پۆستە".

ئەو وتیشی "هەریەك لە حەیدەر عەبادی، حەمید شەتری و باسم بەدری كاندیدن بۆ ئەو پۆستە، بەڵام چانسی باسم بەدری لەهەموویان بەهێزترە".

هاوكات یاسر تەلال ئەندامی تیمی راگەیاندنی نوسینگەی نوری مالیكی لە تۆڕی كۆمەڵایەتی فەیسبووك نوسیوویەتی "لەسەر بەرپرسیاریەتی من، خەونی سودانی بۆ خولی دووەم كۆتایی هات و تائێستا نوری مالیكی كاندیدە بۆ پۆستی سەرۆكی ئەنجوومەنی وەزیران".

جێی ئاماژەیە، پەرلەمانی عێراق سەرۆككۆماری نوێ هەڵبژارد، بەگوێرەی رێكارە دەستوورییەكانیش 15 رۆژ لەبەردەم سەرۆككۆماری نوێیەدایە  بۆ ئەوەی كەسێك بۆ پێكهێنانی كابینەی نوێی حكومەت رابسپێردرێت.