ئیسماعیل قائانی، فەرماندەی هێزی قودسی سوپای پاسدارانی ئێران، ڕۆژی دووشەممە ڕایگەیاند "هەڵبژاردنی سەرۆک وەزیرانی داهاتووی عێراق، مافێکی تایبەت و ڕەهای گەلی عێراقە و جەختی لەسەر ڕەتکردنەوەی هەر جۆرە دەستوەردانێکی دەرەکی لەم پرسەدا کردەوە".
ئاوێنە: ئیسماعیل قائانی لە پەیامێکدا پاش سەردانەکەی بۆ بەغدا ئاماژەی بەوە کرد، پێکهێنانی حکومەتی نوێ "پرسێکی تەواو عێراقییە" و وتیشی: "عێراق گەورەترە لەوەی ئەوانی تر دەستوەردان لە کاروباری بکەن، بەتایبەت ئەو لایەنانەی تاوانیان دژ بە مرۆڤایەتی ئەنجامداوە"، ئەمەش وەک ئاماژەیەک بۆ ویلایەتە یەکگرتووەکانی ئەمریکا.
ئاماژەی بەوەش کردوە، ڕێگری لە هەر دەستوەردانێکی دەرەکی لە پێکهێنانی حکومەتی عێراق دەکەین.
فەرماندەی هێزی قودس ئەوەشی خستە ڕوو، کە لە سەردانەکەیدا پەیامی سوپاس و پێزانینی گەل و حکومەتی ئێرانی گەیاندووەتە لایەنە عێراقییەکان بۆ "هۆشیاری گەلی عێراق" و ڕۆڵی مەرجەعیەتی باڵای ئایینی و بەرپرسانی وڵات لە نیشاندانی هەماهەنگی و هاوکاری نیشتمانی.
جێی ئاماژەیە، دواین سەردانی ئیسماعیل قائانی بۆ بەغدا لە تەمموزی ٢٠٢٥دا بوو، کە تەنها ١٠ کاتژمێری خایاند و تێیدا لەگەڵ سەرکردەکانی چوارچێوەی هەماهەنگی کۆبووەوە، بەبێ ئەوەی چاوی بە محەمەد شیاع سودانی، سەرۆکوەزیرانی ئێستای عێراق بکەوێت.