وەزارەتی دارایی عێراق سەرجەم ئەو هەواڵانەی رەتکردەوە کە باس لە هەڵوەشاندنەوەی گرێبەستی ١٥٠ هەزار پلەی وەزیفی دەکات.
ئاوێنە: ئەمڕۆ سێشەممە وەزارەتی دارایی عێراق لە ڕوونکردنەوەیەکدا دەڵێت "سەرجەم ئەو هەواڵانەی رەت دەکەینەوە کە باس لە هەڵوەشاندنەوەی گرێبەستەکانی بودجەی سێ ساڵە دەکەن، کە ژمارەیان ١٥٠ هەزار پلەی وەزیفییە".
سەبارەت بە وردەکاری ئەو کێشەیە، ئەو وەزارەتەیە رایگەیاند "ئەو کێشەیەی دروستبووە تەنها پەیوەندی بە گرێبەستەکانی پارێزگای کەرکوکەوە هەیە، ئەمەش بەهۆی ئەوەی پارێزگاکە تاوەکو ئێستا خشتە و زانیارییە پێویستەکانی بۆ فەرمانگەی بودجە رەوانە نەکردووە".
هاوکات فەرمانگەی بودجە ئاماژەی بەوە کردووە، نوسراوی فەرمیان ئاراستەی پارێزگای کەرکوک کردووە بۆ دڵنیابوونەوە لە ناوەڕۆکی گرێبەستی حەوت هەزار و ٣٠٤ کەس.
فەرمانگەکە داواشی کردووە، بنەمای یاسایی دامەزراندن و فەرمانە کارگێڕییەکانی دەستبەکاربوونیان ڕەوانەی وەزارەت بکرێت، تاوەکو دڵنیایی بدرێت لەوەی ڕێکارەکان لەگەڵ یاسا و رێنماییەکاندا دەگونجێن.
"پابەندین بە تەواوکردنی رێکارەکان بەو مەرجەی لایەنە پەیوەندیدارەکان زانیارییە یاساییەکان بنێرن". وەزارەتی دارایی عێراق وایوت
وەزارەتەکە داواش لە هاوڵاتییان دەکات نەکەونە ژێر کاریگەری پڕوپاگەندەی میدیایی و تەنها پشت بە سەرچاوە و پلاتفۆرمە فەرمییەکانی وەزارەت ببەستن.