ڕۆژنامەی ۆڵ ستریت جۆرناڵ ڕۆژی سێشەممە لە زاری بەرپرسانی عێراقی و ئەمریکییەوە بڵاویکردەوە، ئیدارەی دۆناڵد ترەمپ، سەرۆکی ئەمریکا، ناردنی دۆلاری بۆ عێراق ڕاگرتووە و بەرنامەکانی هاریکاریی ئەمنیی لەگەڵ سوپای ئەو وڵاتە سڕ کردووە، ئەمەش وەک هەوڵێک بۆ گوشارخستنە سەر بەغدا بەمەبەستی هەڵوەشاندنەوەی ئەو میلیشیا سەر بە ئێران کە لە وڵاتەکەدا بوونیان هەیە.
ئاوێنە: ڕۆژنامەکە ئاماژەی بەوەشکردووە، بەرپرسانی وەزارەتی گەنجینەی ئەمریکا لەم دواییانەدا ڕێگرییان کردووە لە گەیاندنی نزیکەی ٥٠٠ ملیۆن دۆلاری کاشی ئەمریکی (کە داهاتی فرۆشتنی نەوتی عێراقە) لە هەژمارەکانی بانکی یەدەگی فیدراڵی لە نیویۆرکەوە.
ڕاپۆرتەکە ئەوەشی خستووەتەڕوو، واشنتن بەغدای ئاگادار کردووەتەوە کە پارەدارکردنی هەندێک لە بەرنامەکانی بەرەنگاربوونەوەی تیرۆر و مەشقی سەربازی ڕادەگرێت، تا ئەو کاتەی هێرشی میلیشیاکان کۆتایی پێدێت و دەسەڵاتدارانی عێراق هەنگاو بۆ هەڵوەشاندنەوەی گرووپە چەکدارەکان دەنێن.
سەرەتای ئەم مانگە، ویلایەتە یەکگرتووەکانی ئەمریکا باڵیۆزی عێراقی بانگهێشت کرد، دوای ئەوەی فڕۆکەیەکی بێفڕۆکەوان هێرشی کردە سەر دامەزراوەیەکی دیپلۆماسیی سەرەکیی ئەمریکا لە بەغدا، ئەمەش بەدوای زنجیرەیەک هێرشی فڕۆکەی بێفڕۆکەواندا هات کە واشنتن تاوانەکەی خستە ئەستۆی "میلیشیا تیرۆریستییەکانی" هاوپەیمانی ئێران.