سەرباری درێژکردنەوەی ئاگربەست، گرژییەکانی نێوان واشنتن و تاران لەسەر ئاستێکی بەرز بەردەوامن. هەردوو وڵات هەڕەشەی گەڕانەوە بۆ شەڕ دەکەن، لە کاتێکدا پاکستان هەوڵێکی چڕ دەدات بۆ نێوەندگیری، و ئیسرائیلیش ئامادەکاری بۆ ئەگەری سەرهەڵدانەوەی شەڕ دەکات.
ئاوێنە: هەڵوێستی لایەنەکان:
ئەمریکا: دۆناڵد ترەمپ پێی وایە گەمارۆکان لە بۆردومانی سەربازی کاریگەرترن بۆ سەر ئێران و پەلەی نییە بۆ شەڕ. کۆشکی سپی سوورە لەسەر بەردەوامی گەمارۆی دەریایی و پێداگرە لەسەر ئەوەی تاران تەواوی یۆرانیۆمە پیتێنراوەکەی رادەست بکات.
ئێران: مەسعود پزیشکیان پێی وایە گەمارۆ و هەڕەشەکانی ئەمریکا رێگری سەرەکین لەبەردەم دانوستانەکان. لە هەمان کاتدا، تاران جەخت دەکاتەوە کە گەرووی هورمز ناکرێتەوە تا پێشێلکارییەکان بەردەوام بن، و تەنانەت هەڕەشەی داخستنی گەرووی بابولمەندەبیش دەکات بۆ پەکخستنی تەواوەتی بازرگانی لە کەنداو.
پاکستان: وەک نێوەندگیرێکی سەرەکی، ئیسلام ئاباد رێوشوێنی ئەمنی توندی گرتووەتەبەر و ئامادەکاری دەکات بۆ کۆکردنەوەی شاندەکانی هەردوو وڵات بە مەبەستی شکاندنی بەستەڵەکی سیاسی.
چوار گرێکوێرەی سەرەکی بەردەم دانوستانەکان:
گەرووی هورمز: ئەمریکا داوای ئازادی دەریاوانی بێ مەرج دەکات، بەڵام ئێران بەستوویەتییەوە بە هەڵگرتنی گەمارۆی سەر بەندەرەکانی و سەپاندنی باج بەسەر کەشتییەکاندا.
بەرنامەی ئەتۆمی: واشنتن داوای راگرتنی پیتاندن بۆ ٢٠ ساڵ و رادەستکردنی یۆرانیۆم دەکات. ئێران بە توندی رادەستکردن رەتدەکاتەوە و تەنیا ئامادەیە بۆ ٣ تا ٥ ساڵ پیتاندن هەڵپەسێرێت.
سزاکان و سامانی سڕکراو: تاران داوای ئازادکردنی دەستبەجێی زیاتر لە ١٠٠ ملیار دۆلاری سڕکراو دەکات، بەڵام ئەمریکا دەیەوێت پرۆسەکە بە قۆناغ و بە مەرج بێت.
ئاگربەستی مەیدانی: هەردوو لا یەکتری تۆمەتبار دەکەن بە پێشێلکردنی ئاگربەست، ئەمەش متمانەی نێوانیانی لاواز کردووە.