لەگەڵ دواخستنی دووبارەی کۆبوونەوەکانی چوارچێوەی هەماهەنگی بۆ بڕیاردان لەسەر کاندیدێکی سەرۆک وەزیران پێشبینی سیاسی جۆراوجۆر هەیە، ئەمەش ئاماژەیە بۆ ناکۆکی بەردەوام سەبارەت بە میکانیزمی هەڵبژاردن سەرۆکوەزیران، ئەمڕۆش ئەو وادەیەی دەستور دایناوە بۆ دیاریکردنى سەرۆکوەزیران، کۆتایی دێت.

ئاوێنە: هومام حەمودی سەرۆکی ئەنجومەنی باڵای ئیسلامی دەڵێت: چوارچێوەکە کۆمەڵێک پێوەر بۆ هەڵبژاردنی سەرۆک وەزیران داناوە، لەوانە قبوڵکردنی نیشتمانی، پابەندبوون بە دیدگای دەسەڵاتی باڵای ئایینی و گەیشتن بە بەرژەوەندییەکانی عێراق.

کولسیل مخلیس بڕیاردەرى ئەنجوومەنی نوێنەران بە ڕۆژنامەى سەباحى ڕاگەیاند، داوای خێراکردنی یەکلاکردنەوەی مەرجە دەستوورییەکانی کرد، لە پێش هەموویان پێکهێنانی حکومەت، چونکە دواکەوتن زیاتر قبوڵکراو نییە، بە لەبەرچاوگرتنی ئاستەنگە خزمەتگوزاری و ئابوورییەکانی بەردەم وڵات.

ئاماژەی بەوەشکرد، درێژەکێشانی ناکۆکی و چەقبەستووییە سیاسییەکان ڕاستەوخۆ کاریگەری لەسەر ژیانی هاووڵاتییان هەیە، بەتایبەتی لە ڕێگەی دابەزینی خزمەتگوزارییەکان و دواکەوتنی پڕۆژەکانی ئاوەدانکردنەوە و ژێرخانی ئابووری، هاووڵاتییان چاوەڕێی هەنگاوی بەرجەستە و کردارى دەکەن.

ڕوونی کردەوە، پێکهێنانی حکومەتێکی تەواو بەهێز هەنگاوی یەکەمە بۆ چارەسەرکردنی پرسە هەڵپەسێردراوەکان و تواناسازیی دامەزراوە جێبەجێکارەکان بۆ ئەنجامدانی ڕۆڵەکانیان بە شێوەیەکی کاریگەر، هەروەها نەبوونی حکومەتێکی کاریگەر ڕێگری دەکات لە جێبەجێکردنی بەرنامەکانی حکومەت و توانای دەوڵەت بۆ وەڵامدانەوەی ئاستەنگەکان سنووردار دەکات.

دووپاتیکردەوە، پەرلەمان پشتگیری لە هەوڵەکان دەکات بۆ پڕکردنەوەی بۆشاییەکانی نێوان لایەنە سیاسییەکان و گەیشتن بە کۆدەنگی لە چوارچێوەی دەستوریدا، جەختی لەسەر پێویستی پابەندبوون بە ڕێکارە یاساییەکان بۆ بەهێزکردنی متمانەی گشتی بە دامەزراوەکان کردەوە.

سائر کەعبی پەرلەمانتارى عێراق ڕایگەیاند، چوارچێوەی هەماهەنگی بە قۆناغێکی هەستیاردا تێدەپەڕێت لە پرۆسەی سیاسیدا، بە لەبەرچاوگرتنی بەردەوامی ناکۆکی نێوان هێزەکانی ناو چوارچێوەکە، لەگەڵ ئەوەشدا ئیرادەیەکی سیاسی هەیە بۆ پڕکردنەوەی کەلێنەکان و گەیشتن بە ڕێککەوتن.

وتیشی: کات لە هەستیاریدایە، هۆشداریشیدا کە بەردەوامی دواکەوتن دەتوانێت کاریگەری لەسەر ئاستی متمانەی نێوان هێزە سیاسییەکان و خەڵک هەبێت، ئەمەش پێویستی بە کردەوەی خێرا هەیە، بۆ کۆتاییهێنان بە دۆخی ئێستا.

محەمەد حسام حوسێنی، بەرپرسی فەرمانگەی پەیوەندییە نیشتمانییەکان و ئەندامی مەکتەبی سیاسی ڕەوتی حیکمە ڕایگەیاند، ڕاوێژکارییەکان تا ئێستا بەردەوامن، ئەمەش ئەوە پیشان دەدات کە پێناچێت ناوی کاندیدێک لە ئێستادا یەکلایی بکرێتەوە، چونکە گفتوگۆکان لەنێوان لایەنە سیاسییەکان بەردەوامن.

جێگەى ئاماژەیە، بەپێی دەستوورى عێراق، هەردواى هەڵبژاردنى سەرۆککۆمار گەورەترین فراکسیۆنى پەرلەمان دەبێت لە ماوەى ١٥ ڕۆژدا کاندیدێک بۆ پۆستى سەرۆکوەزیران دابنێت، بۆ ئەوەى دواتر لە پەرلەمان دەنگ لە سەر کاندیدەکە و کارنامە و پێکهاتەى حکومەتەکەى بدات، چوارچێوەى هەماهەنگى تەنیا ئەمڕۆى لە بەردەستە بۆ ئەوەى ئەو پۆستە یەکلایی بکاتەوە.