باڵیۆزی بەریتانیا لە بەغداد بڵاوى کردەوە، بەریتانیا پێشوازی لە ڕاسپاردنى عەلی زەیدی وەک سەرۆکوەزیرانى نوێی عێراق دەکات، بەو پەڕى خوشحاڵییەوە چاوەڕوانى کارى هەماهەنگین لەگەڵ عێراق.

ئاوێنە: عیرفان سدیق، باڵیۆزی بەریتانیا لە بەغداد، سەبارەت بە ڕاسپاردنى عەلی زەیدی وەک کاندیدی سەرۆکوەزیران و پێکهێنانى حکومەتى نوێی عێراق ڕاگەیاندراوکی بڵاوکردەوە، کە تیایدا هاتووە، بەریتانیا پێشوازی لە ڕاسپاردنى عەلی زەیدی وەک سەرۆک وەزیرانى نوێی عێراق دەکات، هیوای سەرکەوتن بۆ عەلی زەیدی دەخوازین لە پێکهێنانی حکومەتی نوێ بە خێرایی.

ئاماژەی بەوەشکرد، بەریتانیا بەوپەڕی خۆشحاڵییەوە چاوەڕێی کارکردنە لەگەڵ حکومەتی نوێ لەسەر ئاستەنگە بەپەلەکانی بەردەم عێراق، بەتایبەتی لە بوارەکانی ئاسایش و ئابووریدا.

دواى مشتومڕێکى زۆر شەوى ڕابردوو چوارچێوەى هەماهەنگى عەلی زەیدى وەک کاندید خۆیان بۆ ئەو پۆستە دیاریکرد و ڕاستەوخۆش لەلایەن سەرۆککۆمارەوە ڕاسپێردرا بۆ پێکهێنانی حکومەتی نوێ، بەشێک پێیان وایە ئەمە بۆ کات کوشتنە تا کاندێکى دیکە دیارى دەکرێت، چوارچێوەکە نایەوێت زیاتر لەوادەى دەستوورى لابدات، بەڵام بۆچوونێکى دیکە بەپێچەوانەیە و ئاماژە بەوەدەکات، کە چوارچێوەکە متمانەی تەواوی بە زەیدی داوە.

عەلی فالح کازم زەیدی، کاندیدی سەرۆکوەزیران لە ساڵی ١٩٨٣ لە پارێزگای زیقار لەدایکبووە، خاوەنی بڕوانامەی بەکالۆریۆسە لە یاسا و دارایی و بانک و بڕوانامەی ماستەر لە دارایی و بانک، پێشتر وەک سەرۆکی دەستەی بەڕێوەبەریی بانکی باشوور کاری کردووە، پێش کاندیدکردنی، سەرۆکی دەستەی بەڕێوەبەری کۆمپانیای نیشتیمانیی هۆڵدینگ و سەرۆکی دەستەی بەڕێوەبەریی زانکۆی شەعب و خاوەنی کەناڵی ئاسمانیی دیجلە بووە.