ئەمڕۆ شەممە مەسرور بارزانی پێشوازی لە عەلی زەیدی سەرۆکوەزیرانی عێراق کرد و تیایدا سەرۆکی حکومەتی هەرێم لە کۆبوونەوەکەدا داوای کردووە "دادپەروەرانە رەفتار لەگەڵ هەرێمدا بکرێت".
ئاوێنە: ئەمڕۆ شەممە ٢ی ئایاری ٢٠٢٦، مەسرور بارزانی سەرۆکی حکومەتی هەرێمی کوردستان، پێشوازی لە عەلی زەیدی سەرۆکوەزیرانی ڕاسپێردراوی حکومەتی عێراق و شاندێکی چوارچێوەی هاوئاهەنگیی کرد و لە کۆبوونەوەکەدا هەوڵ و گفتوگۆکانی پێکهێنانی کابینەی نوێی حکومەتی فیدراڵ تاوتوێ کرا.
مەسرور بارزانی لە کۆبوونەوەکەدا باسی لەوە کردووە، ئەوان پشتیوانی پێکهێنانی حکومەتی نوێ دەکەن لەپێناو چارەسەرکردنی کێشە هەڵپەسێردراوەکانی نێوان هەرێمی کوردستان و حکومەتی فیدراڵ لەسەر بنەمای دەستوور و ڕێزگرتن لە مافەکانی خەڵکی کوردستان و قەوارەی هەرێمی کوردستان.
هاوکات وتوشیەتی "ئێستا دەرفەتێکی نوێ هاتووەتە ئاراوە کە کێشەکان بەشێوەیەکی بنەڕەتی و یەکجارەکی چارەسەر بکرێن و بەشێوەیەکی دادپەروەرانە ڕەفتار لەگەڵ هەرێمی کوردستان بکرێت و بەڕێوەبردنی پرۆسەی سیاسی عێراقیش لە سەربنەمای هاوبەشی، هاوسەنگی و سازان بێت".
لەبەرامبەردا سەرۆک وەزیرانی عێراق، سوپاسی پێشوازی و پشتیوانیی سەرۆکی حکومەتی کرد و جەختی کردەوە کە بەهێزبوونی هەرێمی کوردستان، بەهێزبوونی حکومەتی فیدراڵییە و دڵنیایی دەدەین کە بە شێوەیەکی دادپەروەرانە، مامەڵە لەگەڵ هەرێمی کوردستان دەکەین .