عهلی زهیدی، سهرۆك وهزیرانی راسپێردراوی عێراق، رایدهگهیهنێت، هەفتەی داهاتو کابینە نوێیەکەی دەخاتە بەردەم پەرلەمان و دهشڵێت، حکومەتەکەی کۆتایی بە کێشەی موچەی فەرمانبەرانی هەرێمی کوردستان دەهێنێت.
ئاوێنه: عەلی زەیدی، سهرۆك وهزیرانی راسپێردراو بۆ پێكهێنانی حكومهتی عێراق، ئهمڕۆ دوشهممه، لهدوای كۆبونهوهی لهگهڵ نێچیرڤان بارزانی، سهرۆكی ههرێم، به میدیای پارتی وت، "لێکتێگەیشتنی باش هەبو لەبارەی کێشە هەڵپەسێردراوەکانی نێوان هەرێمی کوردستان و حکومەتی فیدراڵی و ئاسانکاریی کرا بۆ چارەسەرکردنیان. ئەو بابەتانەی ماون و پەیوەندیدارن، پشت بە خوا لەم حکومەتەدا یەکلایی دەکرێنەوە."
عهلی زهیدی وتی، لهگهڵ نێچیرڤان بارزانی تاوتوێی بابەتی بەشداریی پارتییان لە حکومەتی داهاتودا كردوه و "بە بەهێزی بەشدار دەبن. پێکەوە هاوکار دەبین لە بەڕێوەبردنی وڵات بە هەمو پێکهاتە، نەتەوە و مەزهەبەکانییەوە."
لهبارهی وادەی راگەیاندنی کابینە نوێیەکە، عەلی زەیدی ئاماژەی بەوە کرد، "سەرەتا یان ناوەڕاستی هەفتەی داهاتو" کابینەکەی دەخاتە بەردەم پەرلەمانی عێراق.
لەبارەی پرسی مووچەی موچەخۆرانی هەرێمی کوردستان سهرۆك وهزیرانی راسپێرداو وتی"هەموو کێشەکانی پەیوەست بە موچەی موچەخۆرانی هەرێمی کوردستان چارەسەر دەبن، ئەمە موچەی گەل و موچەی هاوڵاتیانه، دروست نییە دوابکەوێت."