وەزارەتی دەرەوەی ئێران ڕایگەیاند، عەباس عێراقچى، وەزیری دەرەوەی وڵاتەکە، ئەمڕۆ سێشەممە بەرەو چین بەڕێدەکەوێت لە سەردانێکدا کە تیایدا لەگەڵ هاوتا چینییەکەی پێشهاتە هەرێمی و نێودەوڵەتییەکان و پەیوەندییە دووقۆڵییەکان تاوتوێ دەکات.
ئاوێنە: عومەر هەواش، پەیامنێری ئەلجەزیرە لە تاران ڕایگەیاند، سەردانەکەی عێراقچى چەند ڕۆژێک بەر لە سەردانە چاوەڕوانکراوەکەی دۆناڵد ترەمپ، سەرۆکی ئەمریکا بۆ چین دێت، ئەمەش بەو واتایە دێت کە ئێران کاردەکات بۆ ڕێکخستنەوەی کارتەکانی خۆی لەگەڵ چین، کە وەک هاوبەشێکی ستراتیژی وەسفی دەکات.
هەواش ڕوونیکردەوە کە ئەم سەردانە گرنگییەکی ئابووری زۆر گەورەی هەیە، چونکە چین ڕۆژانە یەک ملیۆن بەرمیل نەوت لە ئێرانەوە هاوردە دەکات، هەروەها چین دابینکەری سەرەکییە بۆ کاڵا بنەڕەتییەکان و ئەو ماددانەی کە لە پیشەسازییە خۆراکی و قورسەکانی ئێراندا بەکاردەهێنرێن، ئاماژەی بەوەشکرد کە گەمارۆ دەریاییەکان ئەم لێشاوەی هاوردەکردنی کەمکردووەتەوە.
وتیشی، لە نێو ئێراندا کەسانێک هەن باس لە پلانی هاوردەکردنی کاڵای چینی دەکەن لە ڕێگەی وشکانییەوە کە بە ئەفغانستان یان پاکستاندا تێدەپەڕێت، لەگەڵ زیاتر پەرەسەندنی قەیرانی گەرووی هورمز.