ڕۆژی چوارشەممە، عەلی فالح زەیدی، سەرۆک وەزیرانی ڕاسپێردراو، پەیوەندییەکی تەلەفۆنی لەلایەن پیت هێگسێس، وەزیری جەنگی ئەمریکاوە پێگەیشت، کە تێیدا پیرۆزبایی لێکرد بەبۆنەی ڕاسپاردنی بۆ پێکهێنانی حکومەتی نوێ.
ئاوێنە: بەیاننامەیەکی حکومەتی عێراق ئەوەی خستەڕوو، لە پەیوەندییەکەدا تاوتوێی پەیوەندییە دووقۆڵییەکانی نێوان عێراق و ویلایەتە یەکگرتووەکانی ئەمریکا لە بوارە جیاجیاکاندا کراوە، بەتایبەتی هەماهەنگیی ئەمنی، بەپێی ئەوەی لە ڕێککەوتننامەی چوارچێوەی ستراتیژیی نێوان بەغدا و واشنتۆندا هاتووە.
هەردوولا جەختیان لەسەر تایبەتمەندیی پەیوەندیی نێوان هەردوو وڵات و گرنگیی کارکردن بۆ دووبارە کاراکردنەوەی لە بواری مەشق و ڕاهێناندا کردەوە، بە ئامانجی بەهێزکردنی تواناکانی هێزە چەکدارەکانی عێراق و بەرزکردنەوەی ئاستی لێهاتووییان.
دوێنێش بەرپرسێکی باڵا لە وەزارەتی دەرەوەی ئەمریکا ڕایگەیاند، لە ماوەی هەڵکشانی گرژییە سەربازییەکان لەگەڵ ئێران، دامەزراوەکانی ئەمریکا لە عێراق ڕووبەڕووی زیاتر لە ٦٠٠ هێرش بوونەتەوە، هاوکات داوای لە عەلی زەیدی، سەرۆک وەزیرانی ڕاسپێردراو کرد کە جڵەوی ئەو گرووپە چەکدارانە بگرێت کە دڵسۆزن بۆ تاران و دژایەتی واشنتۆن دەکەن.