سەرچاوە ئاگادارەکان و بەرپرسانی ئەمریکی ئاشکرایان کردووە کە ئیسرائیل بنکەیەکی سەربازی نهێنی لە ناو جەرگەی بیابانی عێراقدا دامەزراندووە. ئەم بنکەیە کە پێش دەستپێکردنی جەنگ و بە ئاگاداری ئەمریکا بنیاد نراوە، وەک ناوەندێکی لۆجستی و پێگەیەک بۆ هێزە تایبەتەکان بەکارهاتووە بە مەبەستی پاڵپشتی لە هێرشە ئاسمانییەکانی ئیسرائیل بۆ سەر ئێران.

ئاوێنە:  به‌گوێره‌ى ئه‌و زانیاریانه‌ى ڕۆژنامەی وۆڵ ستریت جۆرناڵ-ى ئه‌مریكى ئاشكرایكردوه‌, ئامانجی سەرەکی ئەم بنکەیە کەمکردنەوەی مەودای نێوان ئیسرائیل و گۆڕەپانی جەنگ بووە لە ئێران. تیمی "گەڕان و ڕزگارکردن" لەوێ جێگیر کرابوون تا لە ئەگەری کەوتنەخوارەوەی هەر فڕۆکەیەکی ئیسرائیلیدا بە خێرایی دەستبەکار بن. هەرچەندە هیچ فڕۆکەیەکی ئیسرائیلی نەکەوتووە، بەڵام کاتێک فڕۆکەیەکی F-15ی ئەمریکی لە نزیک ئەسفەهان کەوتە خوارەوە، ئیسرائیلییەکان لەم بنکەیەوە ئامادەیی خۆیان بۆ هاوکاری دەربڕی و بۆ پاراستنی پرۆسەی ڕزگارکردنەکەش هێرشی ئاسمانییان ئەنجامدا.

هه‌روه‌ك له‌زانیارییەکانی ناو ڕاپۆرتەکەدا هاتوه‌، لە سەرەتای مانگی ئازاردا، ئەم بنکەیە خەریک بوو ئاشکرا بێت. شوانێکی ناوچەکە بەهۆی بینینی جووڵەی گوماناوی هەلیکۆپتەر، هێزە ئەمنییەکانی عێراقی ئاگادار کردەوە. کاتێک سوپای عێراق هێزێکی بۆ لێکۆڵینەوە نارد، لەلایەن فڕۆکە ئیسرائیلییەکانەوە بۆردومان کران. بەهۆی ئەم هێرشەوە سەربازێکی عێراقی گیانی لەدەستدا و دووانی تریش بریندار بوون. فەرماندەیی ئۆپەراسیۆنە هاوبەشەکانی عێراق ئەو کات هێرشەکەی بە کارێکی "بێباکانە" و بێ هەماهەنگی وەسف کرد.

ئه‌وه‌ش باسكراوه‌،  سەرەتا عێراق لە نەتەوە یەکگرتووەکان سکاڵای دژی ئەمریکا تۆمار کرد، بەو پێیەی گومانیان دەکرد هێرشەکە لەلایەن واشنتۆنەوە بووبێت، بەڵام دواتر دەرکەوت کە ئەمریکا دەستی لەو بۆردومانەدا نەبووە. سوپای ئیسرائیل لەو بارەیەوە بێدەنگی هەڵبژاردووە، بەڵام "تۆمێر بار" فەرماندەی پێشووی هێزی ئاسمانی ئیسرائیل لە نامەیەکدا بۆ سەربازەکانی ئاماژەی بە "ئەرکی تایبەت" کردووە کە "خەیاڵ دەوروژێنن".

ڕۆژنامه‌ ئه‌مریكیه‌كه‌ ئاماژەی به‌وه‌شكردوه‌، شیکەرەوە سەربازییەکان ئاماژە بەوە دەکەن کە بیابانی ڕۆژئاوای عێراق بەهۆی پان و بەرینی و کەمی دانیشتوانەکەی، هەمیشە شوێنێکی گونجاو بووە بۆ ئۆپەراسیۆنی نهێنی. ئیسرائیل بە بەکارهێنانی ئەم ناوچەیە توانیویەتی هەڵمەتە ئاسمانییەکانی، کە هەزاران هێرشی لە ماوەی پێنج هەفتەدا لەخۆگرتبوو، بە سەرکەوتوویی بەڕێوە ببات.