ئێران و عێراق لە کۆبوونەوەی لێژنەی باڵای ئەمنیی هاوبەش لە بەغدا، جەختیان لەسەر زیادکردنی هەماهەنگییە ئەمنییەکان و کۆنترۆڵکردنی چالاکیی حزبە رۆژهەڵاتییەکانی کوردستان لە هەرێمی کوردستان کردەوە.
ئاوێنە: نوسینگەی قاسم ئەعرەجی، ڕاوێژکاری ئاسایشی نەتەوەیی عێراق ڕایگەیاند "لە کۆبوونەوەی هاوبەشی ئەمنیی تاران و بەغدا، دۆسیەی حزبەکانی رۆژهەڵاتی کوردستان تاوتوێ کراوە و هەردوولا لەسەر توندکردنەوەی ڕێوشوێنە ئەمنییەکان لە ناوچە سنوورییەکان گەیشتنە ڕێککەوتن".
بەپێی ڕاگەیەندراوە بڵاوکراوەکە، شاندی ئێرانی ڕاپۆرتێکی لەسەر چالاکیی ئەم حیزبانە لە هەرێمی کوردستان پێشکەشکردووە و هەردوو وڵات جەختیان لەسەر بەردەوامیی هاوکارییە ئەمنییەکان بۆ ڕێگریکردن لە "جووڵە چەکدارییەکان" کردووەتەوە.
هاوکات لەکۆبوونەوەکەدا بەغدا دووپاتیکردووەتەوە کە ڕێگە نادات خاکی عێراق بۆ هەڕەشەکردن لە وڵاتانی دراوسێ بەکاربهێنرێت.