سیروان بارزانی، خاوەنی کۆمپانیای کۆڕەک تیلیکۆم ڕایگەیاند دادگای بەغدا بڕیارەکانی دژ بە کۆمپانیاکەی ڕاگرت.
ئاوێنە: سیروان بارزانی، خاوەنی کۆمپانیای کۆڕەک تیلیکۆم لە لێدوانێکیدا راگەیاند، “وەک پێشتریش ئاماژەمان پێ دا، بڕیارەکەی سەرۆکی دەستەی گەیاندنی عێراق دژی کۆڕەک تیلیکۆم بێبنەما و نایاسایی بوو”.
وتیشی: “خۆشبەختانه ئەمڕۆ یەکشەممە، دادگای رەسافە لە بەغدا، وەک کاردانەوەیەک بەرامبەر بەو ستەمە، فەرمانێکی دەرکرد بۆ راگرتنی جێبەجێکردنی ئەو بڕیارە نادادپەروەرانەی کە دژی کۆڕەک تیلیکۆم دەرکرابوون. ئێمە هەمیشە متمانەمان بە دادپەروەری و ڕێکارە یاساییەکان هەبووە”.
ئەمەش دوای ئەوە هات کە دەستەی گەیاندنی عێراق رایگەیاند، کۆڕەک تیلیکۆم بڕی نزیکەی یەک ملیار و 500 ملیۆن دۆلار قەرزداری دەوڵەتە، بۆیە بە هەماهەنگی لەگەڵ دەزگای ئاسایشی نیشتمانیی عێراق، نووسینگەی سەرەکیی کۆمپانیاکەی لە ناوچەی جادریە و سێ بنکەی دیکەی فرۆشتنی لە بەغدا داخست.
هەروەها هەڕەشەی راگرتنی تەواوەتیی خزمەتگوزارییەکانی کۆڕەک تیلیکۆم و دەستبەسەرداگرتنی موڵک و ماڵەکانی کردبوو.