لە پارێزگای بابلەوە و لە میانی بەشداریکردنی لە فێستیڤاڵی "پەیمانی بەردەوامی"، نازم سەعدی، سەرۆکی ئەنجومەنی جێبەجێکاری بزووتنەوەی نوجەبا، پەیامێکی گرنگی ئاراستەی ناوەندە سیاسییەکان و حکومەتی نوێی عێراق کرد و ڕایگەیاند کە پرسی چەکداماڵین و کۆنترۆڵکردنی چەک لە کارنامەی حکومەتدا، بە هیچ شێوەیەک باڵەکانی بەرەی مقاوەمە ناگرێتەوە.
ئاوێنە: لە درێژەی لێدوانەکانیدا، نازم سەعدی ڕوونکردنەوەی زیاتری لەسەر ئەو پرسە دا و جەختی لەوە کردەوە کە، مەبەست لە دەستەواژەی "چەکی کۆنترۆڵنەکراو" و سنووردارکردنیان، تەنها ئەو چەکانە دەگرێتەوە کە لە دەرەوەی چوارچێوەی یاسا هەڵگیراون و دەبنە هۆی نانەوەی پشێوی و ئاژاوەگێڕی. ناوبراو ئاماژەی بەوەشدا کە چەکی مقاوەمە لە دەرەوەی ئەو هاوکێشەیەیە، چونکە ئەوان بوون لە سەختترین و دژوارترین قۆناغەکاندا قەڵغانێک بوون بۆ بەرگریکردن لە خاکی عێراق و مەزارگە پیرۆزەکان.
سەبارەت بە هەڵوێستی بزووتنەوەکەیان لەسەر چوونە ناو دەسەڵات، سەرۆکی ئەنجومەنی جێبەجێکاری نوجەبا ڕایگەیاند؛ وەک بزووتنەوەکەیان بە هیچ جۆرێک تێکەڵی پۆستە سیاسی و پەرلەمانییەکان نابن و بەشدارییان تێدا ناکەن، بەڵکو لەبری ئەوە، قورسایی خۆیان دەخەنە سەر ڕۆڵی چاودێریکردنێکی ورد بەسەر پرۆسەی سیاسییەوە، ئەمەش لەپێناو دڵنیابوونەوە لە پێشکەشکردنی خزمەتگوزارییەکان بە هاووڵاتیان و بەدیهێنانی تەواوی خواستەکانیان.
لە کۆتایی پەیامەکەیدا، سەعدی باسی لە گۆڕینی ستراتیژییەتی خەباتیان کرد لە قۆناغی دوای تێکشکاندنی تیرۆردا و وتی: ئەو گەلە تێکۆشەرەی عێراق کە لە سەردەمی جەنگدا باوەشیان بۆ هێزەکانی بەرگری و چەکداران کردەوە، لە ئێستادا چاوەڕوانی جۆرێکی تر لە مقاوەمە دەکەن، کە ئەویش خۆی دەبینێتەوە لە هەڵگیرساندنی جەنگی دژی گەندەڵی و ڕێگریکردن لەو پەراوێزخستنەی کە بۆتە هەڕەشە و مەترسییەکی گەورە بۆ سەر ئایندە و داهاتووی گەنجانی وڵات.