بەپێی نوێترین ڕاپۆرتە نێودەوڵەتییەکان، ناوچەی ڕۆژهەڵاتی ناوەڕاست لە بەردەم مەترسییەکی گەورەدایە و پێدەچێت لە سەرەتای هەفتەی داهاتووەوە گرژییەکان پێ بنێنە قۆناغێکی سەختترەوە. زانیارییەکان ئاشکرای دەکەن کە هەریەک لە ئەمریکا و ئیسرائیل لەوپەڕی ئامادەکاریی سەربازیدان بۆ دەستپێکردنەوەی هێرشەکانیان دژی تاران، لە بەرامبەریشدا کۆماری ئیسلامی ئێران هۆشدارییەکی توند دەدات و ڕایدەگەیەنێت کە ئامانجەکانی گۆڕیوە و هیچ ناوچەیەک لە پارێزراویدا نامێنێت.
ئاوێنە: هەریەک لە ڕۆژنامەی "نیویۆرک تایمز"ی ئەمریکی و ماڵپەڕی "نوور نیوز"ی ئێرانی، وردەکاریی نوێ و مەترسیداریان لەسەر ئەگەری هەڵگیرسانەوەی شەڕی نێوان ئەمریکا و ئیسرائیل لە دژی ئێران بڵاوکردووەتەوە. ئەمڕۆ ڕۆژنامەی نیویۆرک تایمز لە زاری دوو بەرپرسی ئاگاداری ڕۆژهەڵاتی ناوەڕاستەوە ئەوەی خستووەتەڕوو، کە پرۆسەی دانوستانەکان سەبارەت بە دۆسیەی ئەتۆمی و گەرووی هورمز بە تەواوی گەیشتوونەتە خاڵی بنبەست. هەر ئەمەش وایکردووە کە ئەمریکا و ئیسرائیل چڕترین ئامادەکاری بکەن بۆ ئەوەی لە سەرەتای هەفتەی داهاتووەوە شەپۆلێکی نوێی هێرشەکان دەستپێبکەن.
لە بەشێکی دیکەی زانیارییەکانی نیویۆرک تایمزدا ئاماژە بە یەکێک لە بژاردە هەرە مەترسیدارەکانی واشنتۆن کراوە، ئەویش بریتییە لە ناردنی هێزی تایبەتی ئەمریکی بۆ ناو قووڵایی خاکی ئێران. ئامانجی ئەم ئۆپەراسیۆنە دەرهێنان و گواستنەوەی ئەو ماددە ئەتۆمییانەیە کە کەوتوونەتە ژێر داروپەردووی ئەو بنکە و دامەزراوانەی پێشتر بۆردوومان کراون، ئەمەش ئۆپەراسیۆنێکی گەورەیە و پێویستی بە پشتیوانیی هەزاران سەربازی هێزی زەمینی و ئاسمانی دەبێت.
لە بەرامبەر ئەم پێشهاتانەدا، بەرپرسێکی باڵای سەربازیی ئێران لە لێدوانێکی تایبەتدا بۆ ماڵپەڕی نوور نیوز، هۆشدارییەکی توندی داوە و ڕایگەیاندووە کە لە ئەگەری هەڵگیرسانی هەر جەنگێکدا، ئەو شوێنانەی کە لە ڕابردوودا بە ناوچەی ئارام و پارێزراو دادەنران، ئێستا بە تەواوەتی دەکەونە ژێر مەودای ئاگر و هێرشی هێزەکانیانەوە.
ئەو بەرپرسە سەربازییە جەختی لەسەر ئەوەش کردووەتەوە کە لەم قۆناغەدا، ستراتیژیی و هەڵبژاردەی ئەوان بریتی دەبێت لە پێکانی ئەو ئامانجانەی کە لە ماوەی "جەنگی چل ڕۆژە"دا نەکراونەتە ئامانج و پارێزراو بوون.
ئەم پێشهاتە خێرا و ئاڵۆزانە لە کاتێکدان کە درزەکانی دیپلۆماسی قووڵ بوونەتەوە، دانوستانەکان ڕووبەڕووی ئاستەنگی توند بوونەتەوە و دۆخی تەواوی ناوچەکە بەرەو جەنگێکی قورس و فراوان هەنگاو دەنێت.