سەرەڕای گەڕەکانی ڕووبەڕووبوونەوە لەگەڵ حیزبوڵڵا و دوو شەڕەکە لەگەڵ ئێران -سەرباری شەڕە درێژخایەنەکەی سەر غەززە- کوتلە سیاسییەکانی ئیسرائیل نزیکەی وەک خۆیان ماونەتەوە. ئەمڕۆ ڕەنگە بنیامین ناتانیاهۆ، سەرۆک وەزیرانی ئیسرائیل -بەپێی خەمڵاندنە ئیسرائیلییەکان- گرەو لەسەر هەنگاوێکی ئەمنیی یەکلاکەرەوە بکات بۆ گۆڕینی ڕێڕەوی هەڵبژاردنەکان و دواخستنی ساتی یەکلاکردنەوەی سیاسی، ئەمەش بەپێی ڕاپۆرتێکی ماڵپەڕی "والا"ی ئیسرائیلی.
ئاوێنە: لە ٧ی ئۆکتۆبەری ٢٠٢٣وە، شەڕە یەک لەدوای یەکەکان هیچ گۆڕانکارییەکیان لە هاوسەنگیی هێزەکانی نێوان کەمپی ناتانیاهۆ و ئۆپۆزسیۆندا لێ نەکەوتووەتەوە، هەروەها دیمەنەکە نە دوای دوو ڕووبەڕووبوونەوەکەی ئێران و نە دوای گەڕەکانی شەڕ لەگەڵ حیزبوڵڵا گۆڕانی بەسەردا نەهاتووە.
ئەمەش ناتانیاهۆ نیگەران دەکات، لە کاتێکدا زیانەکانی سوپای ئیسرائیل لە باشووری لوبنان بەهۆی هێرشی فڕۆکە بێفڕۆکەوانەکانەوە بەردەوامە، هاوکاتیش ئیدارەی ئەمریکا کۆتوبەند دەخاتە سەر ئۆپراسیۆنە سەربازییەکانی ئیسرائیل لە ناوخۆی لوبناندا.
بەپێی خەمڵاندنەکانی ماڵپەڕە ئیسرائیلییەکە، ناتانیاهۆ چاوەڕوانی ڕووبەڕووبوونەوەیەکی نوێیە لەگەڵ ئێران، کە ڕەنگە سێیەم ڕووبەڕووبوونەوە بێت، بەو هیوایەی گۆڕانکارییەکی گەورە بەدەست بهێنێت کە ڕەنگدانەوەی لەسەر ئاستی سیاسی و سەربازی هەبێت.
ئەم خەمڵاندنانە ئەگەری لاوازکردنی دەسەڵاتی سوپای پاسدارانی ئێران یان گەیشتن بە ڕێککەوتنێک بۆ دەرکردنی یۆرانیۆمی پیتێنراو لە ئێران لەخۆدەگرێت، کە ڕەنگە پێگەی کوتلەکەی ناتانیاهۆ لە ڕووی هەڵبژاردنەوە بۆ سنووری ٦١ کورسی بەرز بکاتەوە.
ناتانیاهۆ چاودێریی ئەو ڕاپرسییانە دەکات کە لە ڕاگەیاندنەکانی ئیسرائیلدا بڵاودەکرێنەوە، کە لە نێوان ٤٩ بۆ ٥٢ کورسی بە کەمپەکەی دەدەن، ئەم ژمارانەش ئاماژەن بۆ ئەگەری دۆڕانی لە هەڵبژاردنەکانی داهاتوودا. بۆیە بەپێی شیکارییەکان، هەوڵدەدات کاتی زیاتر بەدەست بهێنێت، بۆ ئەمەش پشت بە دواخستنی بڕیارەکان دەبەستێت تا کۆتا سات، بەو هیوایەی بارودۆخە سیاسییەکان گۆڕانیان بەسەردا بێت.
لە چوارچێوەیەدا، ناتانیاهۆ هەوڵدەدات پارتە حەرێدییەکان (جوولەکە ئاینییە توندڕەوەکان) قایل بکات کە کاتی زیاتری پێبدەن، سەرەڕای کەمبوونەوەی ئەو دەرفەتانە دوای ئەوەی ڕابی دۆڤ لاندۆ و ڕابی گۆر ڕایانگەیاند کە متمانەیان پێی نەماوە و داوایان کرد بەرەو هەڵبژاردن بڕۆن.
لەگەڵ ئەوەشدا، بەپێی ڕاپۆرتەکە، ناتانیاهۆ هیچ نیشانەیەکی خۆبەدەستەوەدان پیشان نادات، و هەوڵدەدات هەڵبژاردنەکان تا کۆتا سات دوابخات.
هەروەها -بەپێی ماڵپەڕەکە- ئەگەری ئەوە هەیە کە شەڕێکی گەورەی نوێ ببێتە هۆی ڕاگەیاندنی باری نائاسایی و دواخستنی هەڵبژاردنەکان بۆ جارێکی تر، کە ئەمەش شتێکە هەریەک لە ئێهود باراک و ئەڤیگدۆر لیبەرمان هۆشدارییان لێداوە.