وتەبێژی فەرماندەی گشتی هێزە چەکدارەکانى عێراق ڕایگەیاند، یەکەم پایەی ستراتیژی بەرنامەی وەزاری بەهێزکردنی ئاسایشی نیشتمانییە، پابەندبوونێکی پتەوی هەیە بۆ کۆنترۆڵکردنى چەک لە دەستی دەوڵەت و سەپاندنی سەروەری یاسا، هەروەها ڕێگە نادەین وڵاتانی دیکە هێرش بکەنە سەر عێراق و دەستوەردانى لە کاروبارى وڵاتەکەمان بکات.
ئاوێنە: سەباح نوعمان وتەبێژی فەرماندەی گشتی هێزە چەکدارەکانى عێراق سەبارەت بە هەوڵی حکومەتى نوێ بۆ کۆنترۆڵکردنى چەک لە دەستى دەوڵەت و پاراستنى سەروەرى خاکى عێراق، ڕاگەیاندراوێکى بڵاوکردەوە کە تیایدا هاتووە، یەکەم پایەی ستراتیژی بەرنامەی وەزاری لە بەهێزکردنی ئاسایشی نیشتمانی لە ڕێگەی پابەندبوونێکی پتەو بە پرسی کۆنترۆڵکردنى چەک لە دەستی دەوڵەت و سەپاندنی سەروەری یاسا، وەک هەنگاوی بنەڕەتی بۆ کۆتاییهێنان بە دیاردەى چەکداری لە دەرەوەی چوارچێوەی یاسایی و دەستەبەرکردنی سەقامگیری ناوخۆیی پێویست بۆ پاراستنی سەروەری دەوڵەت و دەستەبەرکردنی ئەمنییەت.
ئاماژەی بەوەشکرد، بەرنامەی وەزاری ڕێکارێکی ڕێکخراوەیی توندی گرتووەتەبەر بۆ یەکخستنی بڕیاری ئەمنی و بەستنەوەی هەموو سەرچاوە و تواناکان بە سیستەمی فەرمی دەوڵەتەوە، بەپێی ئەم بڕیارە هەموو گرووپە چەکدارەکان کەوتوونەتە ژێر دەسەڵاتی فەرماندەیی گشتی و بڕیاری یەکگرتووی ئەمنی دەوڵەتەوە.
باسی لەوەشکرد، بەرنامەی وەزاری دیدێکی تەکنەلۆژی مۆدێرنى گرتەبەر بۆ چەسپاندنی ئاسایشی ئۆپەراسیۆنەکان لە ڕێگەی بەهێزکردنی ئاسایشی سنوورەکان و پەرەپێدانی سیستەمی چاودێری بەپێی تەکنەلۆژیا مۆدێرنەکان و بەستنەوەی ئەم تەکنەلۆژییە بە ناوەندى هەواڵگەری هاوتەریبەوە کە ئامانجی بەرەنگاربوونەوەی تیرۆر و تاوانە ڕێکخراوەکانە، هەروەها وشککردنەوەی سەرچاوەکانی داراییانە.
ڕوونی کردەوە، ئەو بژاردە دروستەی عێراق پەسەندی دەکات، ئەوەیە کە خۆی لە بەرەکانى ململانێی ناوچەیی و نێودەوڵەتی دوور بخاتەوە وەک هەنگاوێکی بنەڕەتی بۆ پاراستنی سەقامگیری ناوخۆی خۆی، چونکە ڕێبازى ئەمنی و سیاسی ڕێبازی دیپلۆماسی خۆپارێزی دەگرێتەبەر لەسەر بنەمای بەڕێوەبردنی پەیوەنییەکان بە شێوەیەکی هاوسەنگ.
لە کۆتایدا وتى: عێراق ڕێگە نادات ببێتە ناوچەیەک یان خاڵی دەستپێکردنی دەستدرێژی دژی وڵاتانی دیکە، هەروەها ڕێگەش نادەن بە دەستدرێژیکردنە سەر وڵاتانی دیکە، بۆ ئەوەى ئاسایشی ناوخۆ لە کاردانەوەی ئەمنی و سیاسی قەیرانەکانی ناوچەکە بپارێزێت.