لەم دواییانەدا، کۆنگرێسی ویلایەتە یەکگرتووەکانی ئەمریکا ڕاپۆرتێکی فەرمیی پڕ زانیاریی سەبارەت بەو زیانە گەورانە بڵاوکردەوە کە بەر هێزی ئاسمانیی وڵاتەکەیان کەوتووە. ئەم زیانانە لە میانەی گرژی و جەنگەکانی نێوان ئەمریکا و ئیسرائیل لە دژی کۆماری ئیسلامیی ئێران تۆمارکراون.
ئاوێنە: بەپێی ناوەڕۆکی ڕاپۆرتەکە، لە سەرەتای دەستپێکردنی ئۆپەراسیۆنە سەربازییەکانەوە تا ئێستا، کەرتی ئاسمانیی سوپای ئەمریکا ڕووبەڕووی زیانێکی گەورەی مادیی و سەربازی بووەتەوە. بە شێوەیەک کە بە کۆی گشتی ٤٢ فڕۆکەی جەنگی، بارهەڵگر و فڕۆکەی بێفڕۆکەوان (درۆن) بە تەواوی لەناوچوون یان زیانی بەرچاویان پێگەیشتووە.
وردەکاریی تێکشکانی فڕۆکەکان بەپێی ڕاپۆرتەکەی کۆنگرێس:
فڕۆکە جەنگییەکان: چوار فڕۆکەی جۆری (F-15E) تێکشکاون؛ کە سێیان بەهۆی هەڵەیەکەوە لە وڵاتی کوەیت و یەکێکی دیکەیان لەناو خاکی ئێران کەوتوونەتە خوارەوە. هەروەها، فڕۆکەیەکی پێشکەوتووی جۆری (F-35A) بەهۆی بەرکەوتنی فیشەک و چەکی زەمینییەوە زیانی پێگەیشتووە.
فڕۆکەکانی پاڵپشتی و گواستنەوە: شەش فڕۆکەی جۆری (KC-135) تێکشکاون. لەم ژمارەیە یەکێکیان لە ئاسمانی عێراق بەهۆی ڕووداوێکی ئاسمانییەوە بووە، و پێنج فڕۆکەکەی دیکەش لە بنکەی ئاسمانیی شازادە سوڵتان لە وڵاتی سعودیە بەهۆی هێرشی درۆنییەوە لەناوچوون. هاوکات فڕۆکەیەکی ئاگادارکردنەوەی پێشوەختە لە جۆری (E-3) زیانی بەرکەوتووە.
فڕۆکە بێفڕۆکەوانەکان (درۆن): گورزێکی گەورە بەر ئەم کەرتە کەوتووە، کە تێیدا ٢٤ فڕۆکەی جۆری (MQ-9 Reaper) و یەک فڕۆکەی جۆری (MQ-4C Triton) لەناوچوون.
ئۆپەراسیۆنە تایبەتەکان: لە میانی جێبەجێکردنی ئەرکە تایبەتەکاندا، فڕۆکەیەکی جۆری (A-10) و دوو فڕۆکەی جۆری (MC-130J) بە تەواوی لەناوچوون، لەگەڵ زیانگەیشتن بە کۆپتەرێکی جۆری (HH-60W).
لە بەشێکی دیکەی ڕاپۆرتەکەدا، کۆنگرێس هۆشداری داوە کە بەهۆی بەردەوامیی ئۆپەراسیۆنە سەربازییەکان و هێشتا تەواونەبوونی لێکۆڵینەوەکان، ئەگەری زۆرە ئەم ئامارانە کۆتایی نەبن و گۆڕانکارییان بەسەردا بێت.
لە بەرامبەر بڵاوکردنەوەی ئەم ئامارانەدا، عەباس عێراقچی، وەزیری دەرەوەی ئێران، لە پێگەی تایبەتیی خۆی لە تۆڕی کۆمەڵایەتیی "ئێکس" پەیامێکی بڵاوکردەوە و جەختی لەوە کردەوە کە کۆنگرێسی ئەمریکا ناچار بووە دان بەو ڕاستییەدا بنێت کە دەیان فڕۆکەیان بە بەهای ملیارەها دۆلار لەدەستداوە.
عێراقچی لە درێژەی پەیامەکەیدا بانگەشەی ئەوەی کرد کە هێزە چەکدارەکانی وڵاتەکەی سەرکەوتوو بوون لە خستنەخوارەوەی یەکەمین فڕۆکەی جۆری (F-35). لە کۆتاییشدا هۆشدارییەکی توندی دایە واشنتن و ڕایگەیاند؛ هەر هەوڵێکی ئەمریکا بۆ گەڕانەوە بۆ ناو گۆڕەپانی جەنگەکە، مەترسیی گەورەتر و ڕووداوی "سەرسوڕهێنەر"ی زیاتری بۆیان بەدوادا دێت.