وەزارەتی دارایی عێراق بە فەرمی دەستپێکردنی رێکارەکانی خەرجکردن و پارەدارکردنی مووچەی مانگی ئایاری فەرمانبەرانی راگەیاند، ئەمەش دوای ئەوەی سەرجەم هەنگاوە کارگێڕی و داراییەکانی تایبەت بەو پرۆسەیە بەکۆتا گەیشتوون.
ئاوێنە: لە راگەیەندراوێکدا کە ئەمڕۆ چوارشەممە (20ی ئایار) بڵاویکردووەتەوە، وەزارەتی دارایی عێراق ئاماژەی بەوە کردووە کە فەرمانگەی ژمێریاریی سەر بە وەزارەتەکەیان، بەپێی ئامادەکارییە پێشوەختەکان، راستەوخۆ دەستیان بە پرۆسەی دابەشکردن و خەرجکردنی مووچەی ئەم مانگە کردووە.
لە پێناو رێگریکردن لە هەر درەنگکەوتن و ئاستەنگێک، وەزارەتی دارایی فیدراڵ هۆشداری و رێنمایی ئاراستەی گشت وەزارەتەکان، فەرمانگە پەیوەندیدارەکان و حکومەتە خۆجێییەکانی پارێزگاکان کردووە. لە رێنماییەکەدا داوایان لێدەکرێت کە بە وردی پابەندی رێکارەکانی پارەدارکردنی مانگانە بن و خشتەی پەسەندکراوی مووچە وەک خۆی جێبەجێ بکەن، تاوەکو پرۆسەکە بە شێوەیەکی خێرا و بێ گرفت بەڕێوەبچێت.
لە کاتێکدا مووچەخۆرانی عێراق دەست بە وەرگرتنی مووچەکانیان دەکەن، هێشتا چارەنووسی دابەشکردنی مووچەی مووچەخۆرانی هەرێمی کوردستان پێش هاتنی جەژن روون نییە. هەرچەندە سەرچاوەیەکی ئاگادار لە وەزارەتی دارایی و ئابووریی حکومەتی هەرێمی کوردستان رۆژی سێشەممە ئاشکرایکرد، کە پێشبینی دەکرێت هەر ئەمڕۆ لیستی مووچە رەوانەی وەزارەتی دارایی عێراق بکرێت.
بە وتەی هەمان سەرچاوەی وەزارەتی دارایی هەرێم، بڕیارە شاندێکی تەکنیکیی وەزارەتەکە لیستەکە لەگەڵ تەرازووی پێداچوونەوەی مانگی نیسان بباتە بەغدا و رۆژی دواتر رادەستی وەزارەتی دارایی فیدراڵی بکات. بەڵام خاڵی یەکلاکەرەوە و مەرجی سەرەکی لەم پرۆسەیەدا ئەوەیە؛ ناردنی مووچەی هەرێم لەلایەن بەغداوە، راستەوخۆ بەستراوەتەوە بە رادەستکردنی داهاتە نانەوتییەکانی هەرێمی کوردستان بە حکومەتی فیدراڵی.