ئەندامێکی ئەنجوومەنی نوێنەران جەخت لەوە دەکاتەوە کە وەزارەتی دارایی عێراق ئامادەیە تەمویلی مووچەی هەرێمی کوردستان بنێرێت، بە مەرجێک هەولێر پابەندییە داراییەکانی لە کاتی خۆیدا جێبەجێ بکات.
ئاوێنە: ئەحمەد حاجی ڕەشید، ئەندامی ئەنجوومەنی نوێنەرانی عێراق لە فراکسیۆنی کۆمەڵ ڕایگەیاند، لە نزیکەوە وەزیری دارایی عێراقی بینیوە و ئەویش ئامادەیی نیشانداوە تەمویلی مووچەی هەرێمی کوردستان لە کاتی خۆیدا ڕەوانە بکات. ئاماژەی بەوەش کرد کە وەزیری دارایی جەختی لە پابەندبوونی خۆی بە ڕێککەوتنی نێوان حکومەتی فیدراڵ و هەرێمی کوردستان کردووەتەوە و هیچ گرفتێکی لەبارەی دابینکردنی مووچەوە نییە.
ئەو پەرلەمانتارە ئاماژەی بەوە کرد کە پەیوەندییەکی هاوڕێیانەی لەگەڵ فالح ساری، وەزیری دارایی عێراق هەیە و لە هەردوو خولی 3 و 4ی ئەنجوومەنی نوێنەران پێکەوە بوون. بە گوتەی ئەحمەد حاجی ڕەشید، وەزیری دارایی دووپاتیکردووەتەوە کە تەنها مەرجیان بۆ ناردنی پارەکە ئەوەیە کە هەرێمی کوردستان پابەندییە داراییەکانی لە کاتی دیاریکراودا جێبەجێ بکات.
لەکاتی ئێستادا فشارەکان بۆ سەر حکومەتی فیدراڵ دەستیپێکردووە تاوەکو پێش جەژنی قوربان شایستە داراییەکانی مووچەخۆران ڕەوانە بکات. ئامانجی ئەم فشارانە ئەوەیە کە هاوشێوەی پارێزگاکانی دیکەی عێراق، مووچەخۆرانی هەرێمی کوردستانیش پێش پشووەکانی جەژن مووچەی مانگی 5یان پێ بگات.