لە لێدوانێکی توند و بێپێشینەدا، عیرفان سدیق، باڵیۆزی بەریتانیا لە بەغدا، پەیامێکی ئاراستەی کابینەی نوێی حکومەتی عێراق بە سەرۆکایەتیی "عەلی زەیدی" کرد و داوای لێکرد کە کۆنترۆڵی تەواوەتیی چەکی ئەو گرووپە چەکدارانە بکات کە سەربە ئێرانن.
ئاوێنە: باڵیۆزەکەی لەندەن لە میانەی دەرکەوتنێکی تەلەفزیۆنیدا، بە زمانێکی زبر ڕەخنەی لە گرووپە چەکدارەکانی ناوخۆی عێراق گرت. لە بەشێکی قسەکانیدا ئەو دەنگۆیانەی ڕەتکردەوە کە گوایە ئەو ململانێ و جەنگە هەرێمییەی ئێستا هەیە، هەڵمەتێک بێت دژی "پێکهاتەی شیعە"، و ئەو جۆرە بانگەشانەی بە ناڕاست و دوور لە ڕاستی وەسف کرد.
سەبارەت بە پرسی مانەوەی هێزەکانی حەشدی شەعبی بەم فۆڕمەی ئێستایەوە، عیرفان سدیق ڕاشکاوانە جەختی لەوە کردەوە کە دوای تێکشکاندنی ڕێکخراوی تیرۆریستیی داعش لە ساڵی ٢٠١٧ـدا، هەموو پاساوەکانی مانەوەی ئەو هێزە کۆتاییان هاتووە و لە ڕووی کردارییەوە عێراق پێویستی پێیان نەماوە. هۆشداریشی دا لەوەی کە کێشە بنەڕەتییەکە ئەوەیە کە بەشێک لەو گرووپانە بوونی خۆیان لە چوارچێوەی حەشددا قۆستووەتەوە بۆ خزمەتکردنی بەرژەوەندییە تایبەتییەکانیان، کە ئەمەش بەتەواوی پێچەوانە و دژ بە بەرژەوەندییە باڵاکانی دەوڵەتی عێراقە.
لە درێژەی قسەکانیدا، دیپلۆماتکارە باڵاکەی بەریتانیا پەنجەی ڕەخنەی بۆ تاران درێژکرد و دەستوەردانەکانی ئێرانی لە کاروباری ناوخۆیی عێراق بە هەنگاوێکی "نایاسایی" و "نەگونجاو" ناوبرد.
لە کۆتاییشدا، پەیامێکی ڕوونی ئاراستەی حکومەتی نوێی عێراق کرد و داوای لە کابینەکەی عەلی زەیدی کرد کە بە شێوەیەکی کرداری سەروەریی دەوڵەت بچەسپێنێت، بە جۆرێک کە هەڵگرتن و بەکارهێنانی چەک قۆرخ بکرێت و تەنها لەژێر دەسەڵات و کۆنترۆڵی دامەزراوە فەرمییەکانی حکومەتدا بێت.